Владата ја разгледа и усвои информација за преземените активности за раскинување на Договорот за закуп на административно-деловен простор склучен помеѓу ХЕЈ ДООЕЛ Скопје и Акционерското друштво за приредување игри на среќа, Државна лотарија на Република Северна Македонија
Владата на денешната седница донесе одлука да се формира Совет за управување со јавни финансии, како највисоко координативно тело на Владата за следење на спроведувањето на реформите на управувањето со јавни финансии предвидени со Програмата за реформа на управувањето со јавни финансии 2024–2027 година.
Советот, како што информираат од владината прес-служба, ќе го сочинуваат претседател и девет члена. Претседател ќе биде министерот за финансии, а министрите за европски прашања, за енергетика, рударство и минерални суровини, за јавна администрација, и за дигитална трансформација, како и директорите на Царинската управа и на Управата за јавни приходи и на Бирото за јавни набавки, претседателот на Државната комисија за жалби по јавни набавки и главниот државен ревизор, ќе бидат членови на советот.
Владата ја разгледа и усвои информацијата за преземените активности за раскинување на Договорот за закуп на административно-деловен простор склучен помеѓу ХЕЈ ДООЕЛ Скопје и Акционерското друштво за приредување игри на среќа, Државна лотарија на Република Северна Македонија. Овој договор, како што нагласуваат од владината прес-служба, беше склучен за време на минатата влада и предизвика „силни контроверзни и нереални високи суми при што се споменуваа и одредени лукративни интереси“.
Владата донесе повеќе кадровски одлуки, при што Абаз Селмани го именуваше за национален координатор за интеркултурализам, развој на културата и меѓуресорска соработка, Даниела Јовчевска-Михајловска ја именуваше за вршител на должноста директор на Државниот испитен центар, на предлог на министерот за образование и наука, а Али Абдула го именуваше за вршител на должноста заменик-директор на Државниот испитен центар и Роберт Аџипетров го именуваше за вршител на должноста директор на Педагошка служба, орган во состав на Министерството за образование и наука.