Ова во изјава за Нова.бг го велат од Министерството за надворешни работи на Бугарија како објаснување на потегот на бугарскиот амбасадор во земјава Жељазко Радуков, кој вчера ја одби протестната нота од македонското МНР поради дипломатскиот пропуст со отсуството на македонското државно знаме за време на фотографирањето на претседателката Гордана Сиљановска-Давкова и бугарскиот претседател Румен Радев во Софија
Посетата беше по повод културен настан и нема карактер на државна, официјална или работна посета. Ова во изјава за Нова.бг го велат од Министерството за надворешни работи на Бугарија како објаснување на потегот на бугарскиот амбасадор во земјава Жељазко Радуков, кој вчера ја одби протестната нота од македонското МНР поради дипломатскиот пропуст со отсуството на македонското државно знаме за време на фотографирањето на претседателката Гордана Сиљановска-Давкова и бугарскиот претседател Румен Радев во Софија.
„Посетата беше по повод културен настан – гостување на Националната опера и балет на Република Северна Македонија во Софија и нема карактер на државна, официјална или работна посета. Во такви случаи, протоколарната практика не предвидува интонирање на химните, поставување други државни знамиња, како и други протоколарни атрибути. Ова вчера го изјави и амбасадорот Радуков во разговорот со дипломатите од Министерството за надворешни работи на Северна Македонија“,
наведуваат од МНР на Бугарија за Нова.бг.
Оттаму додаваат дека водени од желбата за добрососедски односи, за време на посетата на македонската делегација на Софија до министрите за надворешни работи и надворешна трговија Тимчо Муцунски и за култура Зоран Љутков биле испратени покани за средби со нивните хомолози.
„За жал, поканата од министерот за надворешни работи, г. Иван Кондов, до министерот за надворешни работи и надворешна трговија, г. Тимчо Муцунски, е одбиена“,
додаваат од бугарското МНР.
Амбасадорот на Бугарија во земјава Жељазко Радуков, кој вчера беше повикан во македонското Министерството за надворешни работи и надворешна трговија, одби да ја прими протесната нота поради дипломатскиот пропуст со неистакнувањето на македонското знаме на средбата на претседателката на државата Гордана Сиљановска-Давкова со нејзиниот бугарски колега Румен Радев во Софија.
МНР потврди дека Радуков ја одбил протестната нота. Овој чин, како што вчера изјавиле за ТВ Сител, претставува тежок дипломатски гаф и оти таа на амбасадорот ќе му биде испратена по дипломатски пат.