Наводите на Трамп за тоа што се случувало на теренот за голф во неделата во голема мера се совпаѓаат со она што претходно го кажаа истражните власти, односно дека напаѓачот Рајан Весли Рут не испукал ниту еден истрел, туку дека агент стрелал од неговото оружје откако забележал пушка кај оградата околу теренот за голф
Експретседателот на САД и актуелен републикански кандидат за нов мандат во Белата куќа, Доналд Трамп, во својот прв јавен настап по инцидентот кој според ФБИ најверојатно бил обид за атентат раскажа детали за она што го доживеал во неделата во неговиот голф клуб „Вест Палм Бич“ на Флорида.
Говорејќи на настан, кој беше пренесуван на Икс и на кој беше промовирана платформата за криптовалути на неговите синови, за настанот во неделата рече дека слушнал истрели додека играл голф со пријатели, меѓу кои бил и бизнисменот Стив Виткоф, пренесува „Гардијан“.
„Сè беше прекрасно, убаво место да се биде, и одеднаш слушнавме пукотници во воздух. Мислам дека беа четири или пет. Звучеа како куршуми, но што знам јас за тоа. Но, Тајната служба веднаш знаеше дека се работи за куршуми“,
рече Трамп.
Тој, дополнително, ѝ се заблагодари на Тајната служба, која, како што кажа, одлично си ја завршила работата.
Откако ги слушнале истрелите, вели Трамп, веднаш влегле во возилата за движење низ голф-терените и брзо заминале од местото.
„Бев со агент и тој заврши фантастична работа, немаше никакво сомневање дека бевме надвор од теренот. Тајната служба заврши одлична работа, сите завршија одлична работа“,
рече поранешниот претседател на САД и актуелен кандидат за функцијата.
Пукотниците, како што кажа Трамп, биле истрели од оружјето на друг агент на Трајната служба кој пукал кон цевка од пушка што ја забележал вперена од грмушките кон теренот за голф и дека другиот не пукал, притоа најверојатно мислејќи на осомничениот напаѓач.
Наводите на Трамп, како што наведува „Гардијан“, во голема мера се совпаѓаат со она што вчера го кажаа надлежните власти. Имено, директорот на американската Тајна служба, Роналд Роу Јуниор, претходно изјави дека осомничениот напаѓач Рајан Весли Рут не испукал ниту еден истрел, туку дека агент стрелал од неговото оружје откако забележал пушка кај оградата околу теренот за голф.
„Тој (осомничениот) не пукаше ниту, пак, пукаше кон нашиот агент. Според извештаите, блиската заштита на поранешниот претседател веднаш го евакуираше претседателот на безбедно место“,
рече Роу Јуниор.
Тој, исто така, наведе дека Трамп бил надвор од видното поле на напаѓачот за време на инцидентот.
Поранешниот претседател, кој за два месеца втор пат се соочува со обид за негов атентат, му се заблагодари и на цивилното лице кое ја запишало регистарската табличка од автомобилот на осомничениот, што потоа ѝ помогнало на полицијата да го открие неговиот автомобил.
„Цивилот направи феноменална работа“,
рече тој.
Сепак, Трамп и официјалните истражни власти се разликуваат во однос на она што би можело да се нарече опис на политичките ставови на Рут и Томас Метју Крукс, напаѓачот кој беше убиен по обидот за атентат врз Трамп за време на митингот во Пенсилванија на 13 јули.
Во врска со ова Трамп ја обвини реториката на демократите. Според него и Рут и Крукс биле дел од радикалната левица.
Сепак, ваков заклучок не може да се извлече од официјалните извештаи на истражните органи во врска со политичката ориентација на двајцата напаѓачи. Иако, 58-годишниот Рут давал мали финансиски донации за демократите во последните години, тој признал дека гласал за Трамп на изборите во 2016 година, пред да почне идеолошка борба чии цели изгледаат некохерентни и збунувачки.
Мотивацијата на Томас Метју Крукс останува нејасна. Во јули, истражителите рекоа дека испитуваат профил на социјалните мрежи со антисемитски и антиимигрантски објави за кои постојат индиции дека можат да се поврзат со Крукс.
Вчера Трамп се обиде да ги обвини претседателот Џо Бајден и потпретседателката Камала Харис за пукањето.
„Нивната реторика предизвикува пукање кон мене, кога јас сум тој што ќе ја спаси земјата, а тие се оние кои ја уништуваат земјата, и одвнатре и однадвор. Тоа се луѓе кои сакаат да ја уништат нашата земја. Тоа се нарекува внатрешен непријател. Тие се вистинската закана“,
изјави Трамп за Фокс њуз дигитал.
Инаку, демократската противкандидатката на Трамп и актуелна потпретседателка на САД, Камала Харис, нејзиниот кандидат за потпретседател Тим Волц и администрацијата на претседателот Џо Бајден го осудија политичкото насилство. Белата куќа соопшти дека претходно Бајден му се јавил на Трамп и му пренел оти е среќен што поранешниот претседател е безбеден.
Сепак, Трамп на настанот на платформата Икс вчера го повтори своето незадоволство од одлуката на Бајден да се откаже од претседателската трка и продолжи со нападите кон Камала Харис.
„Не можеме да имаме марксист и комунист за претседател“,
рече Трамп.