Од опозициската партија го оценија за неодговорно и непрофесионално однесувањето на тимот на претседателката со оглед на тоа што, како што велат, македонската делегација отишла во Софија целосно неподготвена и без координација со протоколот на Радев за тоа што е планирано од протоколарни активности
Сиљановска-Давкова одлучила да ги понижи државата и нејзините граѓани за да не ѝ биде непријатно во Софија, коментираат утринава од опозицискиот СДСМ откако шефицата на државата изјави дека доколку си заминела од кабинетот на бугарскиот претседател Румен Радев, кога забележала дека го нема македонското знаме во просторијата каде што се фотографираа, ќе направела скандал.
„По вчерашното интервју на Гордана Сиљановска повеќе од јасно е дека таа нема ниту капацитет ниту достоинство да биде претседателка на државата. По скандалозната посета на Софија, таа сега информира дека свесно решила да се слика без знаме за наводно да не направела скандал. Свесно се сликала и свесно ја објавила фотографијата, па според ова таа свесно предизвикала понижување на државата и граѓаните“,
пишуваат од СДСМ во писменото соопштение.
Од партијата го оценија за неодговорно и непрофесионално однесувањето на тимот на претседателката со оглед на тоа што, како што велат, македонската делегација отишла во Софија целосно неподготвена и без координација со протоколот на Радев за тоа што е планирано од протоколарни активности.
Додаваат оти ваквиот пристап во дипломатијата, кој го нарекоа аматерски, е недозволив кога пред државата е важен период на одлуки кои треба да ги донесе.
„ВМРО-ДПМНЕ и Мицкоски се директно одговорни за овој срам, заедно и на чело со Тимчо Муцунски кој, исто како Сиљановска, вчера немаше ниту еден конкретен одговор на ниту едно прашање при неговото гостување. Комплетна неспособност и недостојност за големи меѓународни политики демонстрира тимот на Мицкоски“,
велат од СДСМ.
Претседателката на државата Гордана Сиљановска-Давкова синоќа во интервју за Сител изјави дека доколку си заминела кога забележала дека го нема македонското државно знаме во просторијата за фотосесии во кабинетот на нејзиниот бугарски колега, Румен Радев, ќе предизвикала скандал и одлучила да не го направи тоа.