Осомничениот за обид за атентат на Трамп 12 часа чекал во грмушките кај голф-клубот, веќе доби две обвиненија

Осомничениот Рајан Весли Рут (58) во судот во Палм Бич веќе е обвинет за поседување огнено оружје и поседување огнено оружје со избришан сериски број. Против него веројатно ќе бидат покренати уште обвиненија 

Вооружениот напаѓач што во неделата беше уапсен како осомничен дека сакал да изврши атентат врз поранешниот американски претседател и републикански кандидат Доналд Трамп претходно 12 часа бил сокриен во грмушки во близина на голф-клубот на Трамп во Флорида, пренесува Би-би-си.

„Напаѓачот, за кој инспекторите велат дека не испукал ниту еден истрел, бил скриен од добро одржуваните грмушки и високи палми што се околу голф-клубот. Бил опремен со два дигитални фотоапарати, црна кеса со храна, калашников и објектив“,

се вели во написот на Би-би-си.

Жителите од околината на голф-клубот велат дека Трамп, кога нема активности во кампањата, тука ја поминува речиси секоја недела. Но, директорот на Тајната служба Роналд Роу вели дека поранешниот претседател всушност не требало да оди таму, па агентите морале да состават безбедносен план во последен момент.

ФБИ го третира пукањето на голф-терен во Флорида како обид за атентат врз Трамп

Жителите на Палм Бич, се додава во написот, се загрижени околу тоа дали осомничениот знаел дека поранешниот претседател ќе дојде да игра голф или тоа било претпоставка и како можел толку долго да остане незабележан криејќи се во грмушките со пушка.

Осомничениот Рајан Весли Рут (58) се појави во преполниот суд во Палм Бич каде што веќе е обвинет за поседување огнено оружје и поседување огнено оружје со избришан сериски број. Против него веројатно ќе бидат покренати уште обвиненија.  

Си-ен-ен: Едно лице е уапсено по пукотниците во близина на голф-клубот на Трамп – целта најверојатно бил поранешниот претседател

Рајан Весли Рут (58), според медиумски написи, бил сопственик на мала градежна компанија на Хаваи.

Според Си-ен-ен, Рут бил проукраински активист и во десетици објави на социјалните мрежи во 2022 година изразувал поддршка за Украина.

Си-ен-ен: Осомничениот за обидот за атентат на Трамп бил проукраински активист

Рајан Весли Рут (58) минатата година објавил книга во која ги опишал своите напори да ја поддржи Украина во војната против Русија. Во неа напишал дека се обидел да се пријави за учество во војната, но бил одбиен на границата меѓу Полска и Украина. Пишувал и за политичките ситуации во Авганистан, Тајван и Северна Кореја.

Бил чест критичар на Трамп на социјалните мрежи.