Се зголемува бројот на жртви од поплавите во Источна и Централна Европа

Властите во Чешка, Полска и Австрија предупредуваат дека најлошото можеби допрва доаѓа

Бројот на загинати од поројниот дожд и поплавите во Централна и Источна Европа се искачи на најмалку 16, а уште неколку лица се водат како исчезнати, пренесува „Гардијан“.

Властите во Чешка, Полска и Австрија предупредуваат дека најлошото можеби допрва доаѓа.

Шефот на чешката полиција Мартин Вондрашек изјави дека една жена се удавила откако река се  излеала од коритото во близина на Брунтал, град со околу 15 000 жители на североистокот на земјата, додека уште седум лица сè уште се водат за исчезнати.

Во Австрија, локалните медиуми објавија дека двајца мажи на возраст од 70 и 80 години се удавиле откако биле заробени од надојдената вода во нивните домови во градовите Бехајмкирхен и Сиерндорф кои се наоѓаат во тешко погодената североисточна покраина Долна Австрија.

Бројот на жртвите во Полска, според информациите, се зголемува откако едно лице се удавило во југозападниот град Ниса, а четири лица починаа во јужните градови Биелско-Бјала и Ледек-Здрој.

Според метеоролозите од Словачка, денеска и утре водостојот на Дунав треба да кулминира во Братислава кое го делат само 50 сантиметри од врвот.

(ФОТО+ВИДЕО) Циклонот Борис предизвика големи поплави во повеќе земји во Централна Европа

Официјални лица во унгарската престолнина Будимпешта ја зголемија својата прогноза за пораст на водостојот на Дунав во втората половина од оваа недела на повеќе од 8,5 метри, приближувајќи се на рекордното ниво од 8,91 метри поставено во 2013 година.

„Според прогнозите, една од најголемите поплави во последните години се приближува кон Будимпешта, но ние сме подготвени да ја совладаме“,

изјави градоначалникот на Будимпешта, Гергели Карачони.

На границата меѓу Полска и Чешка, во градот Пацков, властите рекоа дека денеска пукнала брана по што градоначалникот најавил евакуација.

Стотици илјади луѓе се евакуирани од своите домови низ територијата на Австрија, Чешка, Унгарија, Романија и Словачка, додека бурата Борис предизвика како што велат „катастрофа од епски размери“.

Од поплавите пукнаа брани, се поплавија улици и се потопија цели населби, а беше прекината струјата на некои места.