Мицкоски вели дека за предлогот на Министерството за економија и труд треба да разговараат со производителите и трговците за да се најде најдобриот начин за сите да бидат задоволни
Предлогот за замрзнување на цените на дел од производите или за ограничување на висината на маржата можно е утре да не биде ставен на разгледување на владината седница, најави премиерот Христијан Мицкоски.
Мицкоски вели дека за предлогот на Министерството за економија и труд, кој изминатата недела се најавуваше дека ќе биде на утрешната владина седница, треба да разговараат со производителите и трговците за да се најде најдобриот начин за сите да бидат задоволни.
„Имав разговор со министерот за економија и труд да ги покани на состанок и производителите и трговците и да разговараме кој е најдобриот начин за да им помогнеме од една страна на граѓаните, а од друга страна и тие да бидат задоволни како производители и како трговци. Не мора да значи дека во текот на утрешниот ден на владина седница ќе биде предлогот или една недела подоцна ако е потребно додека да се усогласат ставовите. Не сакаме на сила ништо да правиме“,
рече Мицкоски одговарајќи на новинарски прашања.
На прашањето дали би ја прифатил мерката со оглед на тоа што неколкупати претходно велеше дека замрзнувањето на цените не е правилно во оваа фаза на економија, Мицкоски рече дека стои зад тоа што го кажал.
„Имате некогаш моменти кога гледате како поединци реагираат како монопол и како дуапол и вие тогаш ќе морате да интервенирате офанзивно. Ова како што ние го правиме. Онаму каде што навистина пазарната економија и пазарните пракси ги диктираат цените таму ние не интервенираме. Но, има услови кога ќе ги видите увозните цени и кога ќе видите како хируршки прецизно е поделен пазарот, тогаш не ви останува ништо друго освен да им помогнете на граѓаните бидејќи не може непристојно некој да се богати на грбот на граѓаните, каде што имаме монопол, дуапол, а во некои случаи и триапол“,
рече Мицкоски.
Тој вели дека е за тоа пазарната економија да ги диктира цените, но, додава тој, има за жал поединци кои ја злоупотребуваат оваа позиција и тука мора ние како Влада на интервенираме.
„Но, во секој случај утрово разговарав со министерот Дурмиши и очекувам дека после овој дијалог ќе излеземе со некоја позиција“,
рече тој.
Прашан дали е повеќе за праксата за замрзнати цени или за ограничување на маржите, Мицкоски одговори дека е за тоа да сопре богатењето и крадењето на граѓаните.
„Имаме намера да разговараме со сите засегнати страни и сите заедно да направиме за доброто на државата. Производителите и трговците од една страна и ние како Влада од друга страна и мислиме добро на државата и на граѓаните. Да најдеме начин како практично да помогнеме. Ние не сакаме тие да бидат исфрустрирани поради насилничкиот однос на Владата“,
додаде Мицкоски.
Тој смета дека есенската кошничка, што се најавува со овој предлог на Министерството за економија и труд, не е задоцнета затоа што есента сè уште не е почната.
Во однос на примената на Законот за нефер трговски практики што на 28 овој месец треба да стапи во сила и со кој се очекува намалување на цените на дел од производите за околу 20 отсто, Мицкоски рече дека не се согласува со таа констатација.
„Не би рекол дека ќе паднат цените за 20 проценти. Производителите тоа го кажуваат, трговците друго кажуваат и кога ќе ги видите соопштенијата што доаѓаат од коморите и од различните структури тогаш ќе се доведеме до една збунувачка ситуација. Утрово разговарав и со претседателот на Стопанската комора и конечно побарав од нив став што да правиме. Еве нека ни кажат бидејќи добиваме различни писма. Дали ние како Влада да останеме на ставот за примена на законот или да го одложиме. Како ќе кажат тие така ќе направиме“,
изјави Мицкоски.
Есенската кошничка со производи што се најупотребувани во овој период од годината, премиерот Мицкоски ја најави минатата недела. Потоа и министерот за економија и труд Бесар Дурмиши рече дека таа се подготвува и оти во неа ќе се најдат ориз, грав, овошје, зеленчук, месо.
Дурмиши рече дека посебна работна група веќе разгледува дали предлогот што ќе го дадат до Владата ќе биде за замрзнување на цените на дел од производите или, пак, за ограничување на висината на маржата.
Министерот за економија и труд Бесар Дурмиши во петокот рече дека очекува в понеделник да добие предлог од работната група за есенската потрошувачка кошница и оти тој потоа треба да помине на редовната седница на Владата во вторник.