Според веб-страницата за следење летови „Флајтрадар 24“, како што објави СДК.мк, авиони на „Туркиш ерлајнс“ и на „Санекспрес“ за малку ќе се судреле на небото над Меѓународниот аеродром во Скопје на 7 септември во 18:32 часот
По објавите за избегнат инцидент со судир на два авиона на небото над Скопје кој се случил на 7 септември, од давателот на навигациски услуги М-НАВ информираат дека пријава е поднесена во пропишаниот рок и дека е отворена истрага за утврдување на фактичката состојба и причините.
Од М-НАВ потенцираат дека таквите настани, како и секаде во Европа, секогаш се навремено пријавени и процесирани од сите релевантни одделенија.
„На 7 септември во 18:30 часот поднесена е пријава за безбедносен настан во пропишаниот рок од извршителите кои работеле на засегнатиот сектор. Согласно правилата и пропишаните процедури, пријавата е регистрирана од страна на одделението ИМС (Integrated Management Systems) и е доставена до Агенцијата за цивилно воздухопловство. Исто така, согласно важечките процедури, од страна на одделението ИМС отворена е истрага за утврдување на фактичката состојба и причините за настанот. Би сакале да укажеме дека ваквите настани, како и секаде во Европа, секогаш се навремено пријавени и процесирани од сите релевантни одделенија, служби и институции, согласно постоечките правни процедури“,
се наведува во соопштението на М-НАВ.
Претходно од Агенцијата за цивилно воздухопловство (АЦВ) потврдија дека постапуваат по настан пријавен од М-НАВ.
„Давателот на навигациски услуги М-НАВ уредно го пријави настанот и АЦВ ќе постапи по него“,
изјавија од АЦВ за МИА.
Според веб-страницата за следење летови „Флајтрадар 24“, како што објави СДК.мк, авиони на „Туркиш ерлајнс“ и на „Санекспрес“ за малку ќе се судреле на небото над Меѓународниот аеродром „Скопје“ на 7 септември во 18:32 часот.
Се работи за авионот на „Туркиш ерланс“ на летот од Мадрид за Истанбул и за авионот на „Санекспред“ од турскиот Даламан за Лондон, Гетвик. На 30 секунди пред да се разминат, авионите биле на иста висина од 36 000 стапки. Пред да се разминат, едниот авион се кренал на 36 325 стапки, а другиот се спуштил на 35 475.
Според правилата на авиосообраќајот, меѓу авионите треба да има 2 илјади стапки во вертикална далечина.