Стамеска поседуваше богата актерска емоционална палета, стабилен и логичен израз, како и топол, милозвучен, убедлив глас, велат од Драмскиот театар Скопје
Првенката на Драмскиот театар Скопје и една од ведетите на македонското глумиште, Снежана Стамеска, почина на 79-годишна возраст, соопштија од нејзиниот матична театарска куќа.
Родена на 1 јануари 1946 година во Скопје, Стамеска од нејзиното вработување во 1971 година до пензионирањето во 2010 г. беше член на ансамблот на Драмскиот театар Скопје.
По дипломирањето на Театарската академија во Белград во 1970 г., Стамеска во својата исклучително плодна актерска кариера одиграла преку седумдесет улоги во матичниот театар и на сцените на неколку други македонски театарски куќи.
Покрај театарските, таа реализираше и многу значајни телевизиски и филмски улоги. Исклучителната популарност Стамеска ја стекна во 1980-тите и 1990-тите години на минатиот век кога публиката ја засака во улогите на Пандора во Солунски патрдии (1979), Вера во Диво месо (1979), Сина во телевизиската серија Трст виа Скопје (1987), Вера во Среќна Нова ’49 (1985), и Паца во Викенд на мртовци (1985).
Снежана Стамеска поседуваше богата актерска емоционална палета, стабилен и логичен израз, како и топол, милозвучен, убедлив глас, велат од Драмскиот театар Скопје.
Во својата богата актерска кариера, нејзиниот талент и работа беа признаени со голем број награди, дома и во странство. Меѓу нив, можат да се вбројат Златниот лаворов венец за најдобро актерско остварување на фестивалот „Мали“, награда за актерско остварување на Македонскиот театарски фестивал „Војдан Чернодрински“ за улогата на Вера во претставата Среќна Нова ’49, награда за најдобро актерско остварување на ревијата „Екран“ за улогата на Зоја во претставата Зојкиниот стан (1987), потоа наградата на фестивалот „Стериино позорје“, како и наградите „11 Октомври“ и „Климент Охридски“.
Посмртните останки на Стамеска ќе бидат изложени утре на 9 септември од 10 часот во капелата на гробиштата Бутел по што ќе се изврши погребот.
Драмски театар Скопје дополнително ќе ја објави информацијата за денот на одржување на комеморацијата во чест на големата актерка Снежана Стамеска.