„Истото се случува и со полициските хеликоптери. Двата моментално се неисправни. Оптимисти сме дека во текот на утрешниот ден големиот полициски хеликоптер „Ми-171“ ќе биде функционален и ќе можеме да го користиме“, веи директорот на ЦУК, Стојанче Ангелов
Ситуацијата со големиот пожар во прилепско Мариово и понатаму е критична. Според последните информации, зафатена е површина од околу 16 000 хектари, а периметарот на огнената линија изнесува 110 километри.
Од прилепскиот кризен штаб, како што пренесува МИА, информираат дека на теренот се ангажирани преку 200 професионалци од повеќе надлежни служби и институции во државата.
Началникот на кризниот штаб, Борче Јовчески, вели дека фокусот е на населените места каде што будно се внимава огнот да не дојде до нив, а силите главно се концентрирани на четири до пет критични локации.
„Во моментов професионалците се лоцирани на четири до пет места каде пожарот е најактивен, во близината на селата Крушевица, Бонче и кон Штавица, каде се наоѓаат 50 припадници на АРМ и други професионалци кои ја дополнуваат таа група. Потоа кај селата Вепрчани и Дуње, каде се уште 50 припадници на АРМ. Со механизирани возила помагаат и од блиските рудници“,
ја пренесува МИА изјавата на Јовчески.
Директорот на Центарот за управување со кризи, Стојанче Ангелов, информирајќи за ситуацијата со пожарите во видеоизјава денеска попладне го оцени пожарот во Мариово како најголем, најкомплициран и најтежок за гаснење.
На овој пожар утрово биле упатени 100 припадници на Армијата, 25 припадници на специјалната полициска едница „Тигар“, триесетина вработени во „Национални шуми“, како и два тима на Дирекцијата за заштита и спасување со повеќе од 25 лица.
Во гаснењето на пожарот утрово, вели Ангелов, помогнал и еден „ертрактор“ на Дирекцијата за заштита и спасување, додека останатите два, како што кажа, се неисправни и не се во состојба да летаат.
„Истото се случува и со полициските хеликоптери. Двата моментално се неисправни. Оптимисти сме дека во текот на утрешниот ден големиот полициски хеликоптер ‘Ми-171’ ќе биде функционален и ќе можеме да го користиме. Има најави од УХМР за можен дожд на територијата на Мариово и прилепската околина, но засега овие прогнози не се остваруваат“,
вели директорот на ЦУК.
На територијата на општина Прилеп, додава тој, има уште два пожари, кај месноста Дервен и кај село Смолане, а сериозен шумски пожар има кај селото Десово во блиската општина Долнени.
„Покрај овие, активни се два пожари на територијата на општина Чашка. Пвиот е на планината Мукос, пожар кој во повеќе наврати се става под контрола или е целосно изгаснат, но за жал повторно доаѓа до негово реактивирање или потпалување. Вториот пожар во Чашка се наоѓа во атарот на селата Голозинци и Мелница“,
соопшти Ангелов.
И понатаму, како што информира тој, активен е пожарот над викенд-населбата Катланово. Според директорот на ЦУК, станува збор пожар кој се наоѓа на исклучително тешко пристапен терен, но не е загрозено ниту едно населено место.
Според ЦУК, денеска на територијата на целата државата има вкупно 13 пожари на отворен простор, од кои девет се активни, еден е под контрола, а три се изгаснати.