Костовски најголемиот успех го постигна како тренер на олимпиецот Дејан Георгиевски, кој го освои сребрениот медал на Олимписките игри во Токио во 2021 година
Признанија за остварувања во областа на спортот денеска им беа доделени и на Мирко Димчевски, Рамадан Шабани и Димитар Јованов, како и на првиот стрелец на гол за Македонската фудбалска репрезентација, Зоран Бошковски
Ништо не е невозможно за тој што ќе се осмели, истакна Борче Костовски, спортски работник, тренер и претседател на Таеквондо федерацијата на Македонија, кој е добитник на годинешната награда за животно дело „8 Септември“, која се доделува по повод Денот на независноста.
Наградата на Костовски му беше доделена денеска на свеченост што се одржа во Кристалната сала на Собранието на Република Северна Македонија.
Костовски најголемиот успех го постигна како тренер на олимпиецот Дејан Георгиевски, кој го освои сребрениот медал на Олимписките игри во Токио во 2021 година.
Во своето обраќање на свеченоста, тој рече дека една мала група на одбрани се осмелила да направи чекор од Скопје до Токио, кој трае седум години.
„Се осмеливме да освоиме олимписка норма, да ги погледнеме најсилните противници во нашиот спорт во очи и да ги победиме. Се осмеливме да стигнеме во олимписко финале на Олимписки игри, сето тоа резултираше со сребрен медал и со поставување на нашето знаме на олимпискиот подиум“,
рече тој.
Заблагодарувајќи се, Костовски рече дека наградата ја посветува на својот татко и на целата чесна работничка класа.
Министерот за спорт Борко Ристовски на настанот рече дека сите пријавени кандидати биле заслужено на листата за доделување на признанието и порача дека ова треба да биде поттик следната година да има уште повеќе пријавени кандидати, а државата и Министерството да имаат уште повеќе награди за доделување.
„Како министерство секогаш ќе бидеме на страна на спортистите и спортските работници. Овие награди кои ги добивате се огромна чест, но и огромна одговорност, да ги носите со гордост и со достоинство и да бидете достојни претставници на македонското општество кое врз база на вашите дејствувања ќе гледа во вас идоли и ќе се градиме како општество“,
рече министерот за спорт.
Признанија за остварувања во областа на спортот денеска им беа доделени и на Мирко Димчевски, Рамадан Шабани и Димитар Јованов, како и на првиот стрелец на гол за Македонската фудбалска репрезентација, Зоран Бошковски.
Со наградата за животно дело „8 Септември“ Костовски се стекнува со правото за доживотна пензија, додека останатите четворица ќе добијат еднократна парична награда во висина од десет просечни плати.