Министерот вели дека сѐ уште нема добиено информација од што беше предизвикана миризбата во хируршките клиники во Клиничкиот центар „Мајка Тереза“
Министерот за здравство Арбен Таравари потврди оти ја информирал Владата дека обврската за набавка на компресорската станица во Клинички центар ќе ја преземе Министерството за здравство и се надева дека што поскоро ќе почне процедурата за средување на компресорскиот центар и сите проблеми со хируршките сали.
И покрај тоа што првиот тендер за набавка на компресорите за хируршките сали на Клиничкиот центар беше поништен бидејќи не пристигнала ниту една понуда, Таравари вели дека сега повторно ќе се оди преку јавна набавка.
„Ќе одиме преку јавна набавка за да биде што потранспарентно и ќе бараме роковите што поскоро да завршат. Можеби ќе поставиме услов тоа да заврши за максимум три до четири месеци. Не можам да предвидам дали ќе се јави некој. Како Министерство преземавме нешто што не е наша обврска, сѐ со цел да ја звршиме што побрзо. Но, не можам да кажам со сигурност дали ќе се пријави или не. Ако не се пријави, тогаш ќе одиме на опција да побараме некој што може да го работи и да се договориме директно, Министерството со изведувачот“,
рече Таравари.
Додека да се заврши набавката и компресорите да се стават во функција, Таравари вели дека салите ќе функционираат со надворешни компресори и дополнително со садови со компримиран воздух.
„Мора така да функцинираат до ноември или декември кога ќе заврши комплетно поставувањето на нова компресорска станица и нова инсталација. Дотогаш ќе направиме повторно уште едно усогласување и со ’8 Септември’ и со Градската болница, одредени потешки случаи коишто нема услови да се сработат да бидат работени во овие две болници кои и досега работат добро, но можеби ќе побараме нивен поголем ангажман“,
додаде тој.
Министерот вели дека сѐ уште нема добиено информација од што беше предизвикана миризбата во хируршките клиники во Клиничкиот центар „Мајка Тереза“.
Тој денеска беше прашан дали ќе се дознае вистината од што мирисаше во хируршките сали и дали уште се чека извештајот од Германија, на што одговори дека веќе разговарал со докторите, одговорните и со директорите за да добие информација, но не сака да дава изјава која, како што рече, можеби нема врска со вистината.
„Сѐ уште немам добиено извештај. Разговарав со докторите, одговорните и со директорите за да добијам информација, меѓутоа не би сакал да избрзам и да дадам некоја изјава која нема врска со вистината. Можеби тие и подолг период се инсталирани, повеќе од 30 години, можеби и тоа е причината, а можеби е и нешто друго за кое сѐ уште немам точна информација“,
рече Тарвари, кој беше на увид во градежните активности за изградба на новата зграда на Здравствениот дом во општина Илинден.
Во однос на тоа дали побарал кадарот од Клинички центар да може барем во попладневните часови да ги користи просториите во овие две болници, Таравари рече дека за тоа има законска препрека, но оти се бара решение.
„Ако има договор меѓу нас, се надевам дека ќе изнајдеме решение или барем еден од докторите да работи со екипите во ’8 Септември’ и во Градска болница“,
рече тој.
Прашан дали треба конечно да се преструкуира работата на Заеднички служби бидејќи една од причините е недовербата и неплаќањето на оваа институција кон нивните должници, Таравари одговори дека секако ќе има нова реорганизација на Клинички центар.
„Секако ќе имаме нова реорганизација на Клинички центар. Прво ќе направам советодавно тело во министерството кое ќе биде одговорно, меѓу другото, и за новиот закон за здравствена заштита и за стратегијата за здравство во нашата држава. Ќе планираме каде и како би го реорганизирале, дали тоа ќе остане во склоп на Клинички центар или ќе остане посебно претпријатие. Треба да добијам експертски мислења и потоа да започнеме со подготвување на нов закон за здравствена заштита. Морам да видам како планираме да го реорганизираме, има повеќе идеи, ми требаат совети и од луѓе што се малку поискусни од мене. Се надевам дека ќе одлучиме и ќе донесеме најдобро можно решение“,
додаде тој.
Инаку, за потсетување, централниот систем за кислород и компримиран воздух во хируршките сали во Клиничкиот центар е надвор од функција од 18 мај поради непријатниот мирис кој се ширел од него.