Демонстрантите, организирани од активистичката група „Еврејски глас за мир“, носеа црвени маици со натпис „Не во наше име“ и „Евреи за разоружување на Израел“. Некои носеа транспаренти на кои пишуваше „Веднаш прекин на огнот“ и „Нека живее Газа“
Еврејските активисти кои вчера протестираа во зградата на Конгресот против американската воена поддршка на Израел беа уапсени, еден ден пред израелскиот премиер Бенјамин Нетанјаху да се обрати во Конгресот.
Демонстрантите, организирани од активистичката група „Еврејски глас за мир“, носеа црвени маици со натпис „Не во наше име“ и „Евреи за разоружување на Израел“. Некои носеа транспаренти на кои пишуваше „Веднаш прекин на огнот“ и „Нека живее Газа“.
Протестите се планирани за време на посетата на Нетанјаху на Вашингтон. Израелскиот премиер ќе се сретне со американскиот претседател Џо Бајден, со потпретседателката Камала Харис и со републиканскиот претседателски кандидат Доналд Трамп.
„Овде сме во зградата каде што, во изминатите девет и пол месеци, членовите на Конгресот постојано одлучуваа да испратат бомби за да извршат геноцид“,
напишаа од организацијата на социјалната мрежа Икс.
Активистичката група соопшти дека повеќе од 250 демонстранти биле уапсени и дека 400 луѓе учествувале во протестите. Полицијата тврди дека биле уапсени околу 200 учесници.
Демонстрантите легално влегоа во зградата „Канон хаус“, во која се сместени канцелариите на пратениците и која е дел од комплексот Капитол, соопшти полицијата во вторникот.
„Им кажавме на демонстрантите кои легално влегоа да престанат бидејќи во спротивно ќе бидат уапсени. Тие не застанаа“,
се вели во соопштението на полицијата.
„Протестирањето во зградите на Конгресот е нелегално“
Полицијата на Капитол соопшти дека демонстрантите не го исполниле барањето, што довело до нивно протерување од зградата.
„Протестирањето внатре во зградите на Конгресот е спротивно на законот“,
велат од полицијата.
Нетанјаху денеска треба да се обрати пред Конгресот, што е ретка чест за странски лидер. Тој ќе зборува во време на тешки критики за неговото справување со војната во Газа упатени од страна на администрацијата на американскиот претседател Џо Бајден и врвните демократи.
Се очекува посетата на израелскиот премиер да го врати вниманието на конфликтот во Газа.
Нетанјаху пристигна во Вашингтон во период на политичките превирања во САД по повлекувањето на Бајден од претседателската трка.