„Во однос на тој потег треба сериозно да се седне и да се разговара со Бугарија. Да се види дали ова е најдобриот проект, дали тие можат да го изведат од нивна страна и дали има алтернативни, поевтини решенија, кои заедно би ги изградиле, а би реализирале одржлив проект, кој не е толку скап“, рече министерот за транспорт
Постои една долгогодишна желба да се изгради пруга меѓу Скопје и Софија. Тоа е одлична идеја и треба да се реализира, но прашањето е како. Во моментов постои пруга меѓу Скопје и Куманово и се гради и при крај е првата делница што оди од Куманово до Бељаковце. Втората фаза од Бељаковце до Крива Паланка се гради со многу бавна динамика. Третата фаза, пак, е од пред Крива Паланка до Бугарија, и е со многу маани во себе, особено што тој проект може да се изгради до нашата територија, а Бугарија воопшто нема проект за од другата страна.
Ова денеска го изјави министерот за транспорт Александар Николоски при увидот на патот Ранковце – Крива Паланка, одговарајќи на новинарско прашање дали ќе се бара решение за земениот заем од Европската банка за обнова и развој за изградба на пругата кон Бугарија, која завршува во тунел.
„Бараме и од Европската банка за обнова и развој и од Европската инвестициска банка со кои потпишале договор претходната влада на СДСМ и ДУИ, тие средства да се пренаменат за изградба на брза пруга по Коридорот 10 и рехабилитација на постојниот Коридор 10. Од Табановце до Гевгелија, значи од границата со Србија до границата со Грција за да можат возовите да одат со 100 до 120 километри на час, а тоа рехабилитација на постојната пруга, проект што ќе чини 250 милиони евра“,
рече тој.
Според него, тоа значи дека цела линија север-југ чини двојно помалку од 24 километри на потегот од Крива Паланка до границата со Бугарија. Во таа насока, предлага да се седне и да се разговара со бугарската страна и да се види дали изградбата на пругата кон Бугарија може да се реализира.
„Во однос на тој потег треба сериозно да се седне и да се разговара со Бугарија. Да се види дали ова е најдобриот проект, дали тие можат да го изведат од нивна страна и дали има алтернативни, поевтини решенија, кои заедно би ги изградиле, а би реализирале одржлив проект, кој не е толку скап“,
вели Николоски.
Објаснувајќи ги маните на третата траса од пругата од Крива Паланка кон Бугарија, министерот за транспорт рече дека таа поминува низ градот Крива Паланка и треба да сруши 20 куќи, како и дека поминува низ планински појас, со што, според него, возовите нема да можат да се движат повеќе од 60 километри на час.
„Трасата завршува во тунел, кој од другата страна не води никаде. Ние можеме да го изградиме само до нашата територија, а Бугарија воопшто нема проект за другата страна. Точно е дека од бугарска страна кај Ѓуешево има пруга, но до границата нема пруга. Дали Бугарите ќе изградат и кога е прашање за кое немаме одговор“,
рече министерот.
Николоски посочи дека проектот за трасата Крива Паланка до Бугарија предвидува на само 24 километри пруга да се изградат 22 тунели, за што смета дека ниту еден изведувач нема да може да го реализира тоа за период од четири години.
Проценетата вредност на 24 километри пруга е 452 милиони евра, а со надзор, техничка поддршка и електрификација чини вкупно 560 милиони евра, од кои, според Николоски, 350 милиони евра се кредити.
„Кредити што идните генерации треба да ги плаќаат, што значи дека ова ќе е најскапата пруга во Европа. Еден километар ќе чини некаде околу 24 милиони евра. Дали вреди да се потрошат 560 милиони евра народни пари во сиромашна Македонија за пруга која никогаш нема да се заврши? Само што ќе ги фрлиме парите и ќе имаме ситуација каде што за 10 години уште ќе зборуваме дека пругата не е завршена“,
вели Николоски.