ДУИ беше на власт 22 години. И со ВМРО-ДПМНЕ и со СДСМ, и можеа сите овие идеи да ги спроведат додека беа на власт. Сега во опозиција што ќе им текне, кажуваат, но мислам дека не се сериозни, тоа е само за политички поени, вели Таравари
Идеите на ДУИ се несериозни и тешко спроведливи, вели министерот за здравство и еден од челниците на коалицијата „Вреди“, Арбен Таравари. На новинарско прашање за намерата на „интегративците“ да се озакони принципот на коалицирање победник со победник, но и идејата за поделба на земјава по примерот на Белгија и Северна Ирска, која, како што пренесе ТВ 21, деновиве ја иницирале ДУИ, според Таравари се обид за собирање политички поени.
„Ми изгледаат доста несериозни, ДУИ 22 години беа на власт и со ВМРО-ДПМНЕ и со СДСМ, и можеа сите овие идеи да ги спроведат додека беа на власт. Сега во опозиција што ќе им текне, кажуваат, но мислам дека не се сериозни, тоа е само за политички поени. Ние политичарите и во позиција и во опозиција кога зборуваме нешто треба да имаме поширок консензус. Сум кажал, за сè можеме да разговараме, меѓутоа 22 години ништо не си кажал и сега од опозиција за два месеци имаш големи идеи кои се, искрено, тешко спроведливи. Им поскаувам да бидат поконструктивна опозиција, а не вака да излегуваат со работи кои не држат и тешко поминуваат“,
рече Таравари.
На 13 јули, по состанок во седиштето на ДУИ, партијата усвои една резолуција за почитување на начелото легитимитет во контекст на одредбите од Охридскиот договор, а друга за неопходноста од спроведувањето на Охридскиот, Преспанскиот и Договорот за добрососедство со Бугарија. Во усвоените резолуции, ДУИ ги повикува државните институции и меѓународната заедница на ангажман за целосно и континуирано спроведување на Охридскиот, Преспанскиот и Договорот за добрососедство.
„Секако дека ќе изготвиме решение бидејќи по вторпат во државата се случува да не се почитува легитимитетот. Имајќи предвид каква е етничката реалност во државата, тоа би довело, ако дозволиме така, да се нарушат многу досегашни достигнувања во духот на Рамковниот договор. Истовремено јавно објавивме дека е ангажиран и еден од оние што го изготвија Рамковниот договор и духот на овој договор да се прецизира со законско или уставно решение начелото победник со победник, односно партиите коишто го имаат етничкиот легитимитет и не случајно ние како ‘Европски фронт’ имаме политички став дека оваа Влада нема легитимитет“,
изјави пратеникот од ДУИ, Блерим Беџети, на прес-конференција на 18.7.2024.
Од партијата потврдија и дека американецот Пол Вилијамс, еден од авторите на Охридскиот рамковен договор, ќе биде меѓу тие што Демократската унија за интеграција (ДУИ) ќе ги ангажира за прецизирање на законско или уставно решение на т.н. Мајски договор, односно озаконување на меѓупартиското коалицирање по принципот победник со победник.
Идејата на ДУИ ја отфрлија и од ВМРО-ДПМНЕ.
Според нив, станува збор за рекетарски принцип – ако не сме во власта за да крадеме, тогаш ќе создадеме етнички прашања и поделби, порача вчера портпаролката на ВМРО-ДПМНЕ, Марија Митева.
„До пред месец и половина ДУИ беше власт заедно со СДС и тогаш на Али Ахмети не му беше важна регионалната поделба на Македонија, како што му беше важно ‘Арберија’ да ги добива тендерите на Артан, внукот на Али да ја купува ‘Соравија’, или, пак, фирмите подизведувачи на ‘Бехтел и Енка’ да се истите од Зајас или блиски до ДУИ“,
рече Митева.