Асанж (52), според пишувањата на „Гардијан“, се согласил да се изјасни за виновен по едно кривично обвинение за заговор за добивање и откривање доверливи документи за националната безбедност на САД, според поднесоците во американскиот окружен суд за Северните Маријански Острови
Џулијан Асанж е ослободен од британскиот затвор и се очекува да се изјасни за виновен за кршење на американскиот закон за шпионажа, во договор што ќе му овозможи да се врати дома во родната Австралија, пренесува „Гардијан“.
Асанж (52), според пишувањата на „Гардијан“, се согласил да се изјасни за виновен по едно кривично обвинение за заговор за добивање и откривање доверливи документи за националната безбедност на САД, според поднесоците во американскиот окружен суд за Северните Маријански Острови.
Викиликс на социјалните мрежи објави видео од својот основач како синоќа се качува на лет на лондонскиот аеродром „Станстед“, а австралискиот премиер Ентони Албанезе потврди дека го напуштил Обединетото Кралство.
Julian Assange boards flight at London Stansted Airport at 5PM (BST) Monday June 24th. This is for everyone who worked for his freedom: thank you.#FreedJulianAssange pic.twitter.com/Pqp5pBAhSQ
— WikiLeaks (@wikileaks) June 25, 2024
Асанж, наводно, патува на сослушување на островот Саипан на Северните Маријански Острови, каде што се очекува утре во 9 часот по локално време да биде осуден (23 часот по Гринич во вторник). Според Албанезе, тој е придружуван од високиот комесар на Австралија во Велика Британија, Стивен Смит.
„Без оглед на ставовите што луѓето ги имаат за Џулијан Асанж и за неговите активности, случајот се одолговлекува предолго, нема што да се добие од продолжувањето на неговиот престој во затвор и сакаме тој да се врати дома во Австралија“,
рече Албанезе.
Според договорот, кој мора да биде одобрен од судијата, Асанж најверојатно ќе ги добие петте години што веќе ги одлежа и нема да се соочи со нова затворска казна.
Во писмото до федералниот судија во Окружниот суд за Северните Маријански Острови, висок функционер на Министерството за правда рече дека бил испратен во Саипан поради неговата блискост до земјата на државјанството на обвинетиот. Официјалниот претставник додаде дека откако ќе заврши сослушувањето за изрекувањето на пресудата, се очекува Асанж да отпатува за Австралија.
Викиликс на Икс објави дека Асанж го напуштил затворот Белмарш во понеделникот наутро, по 1 901 ден поминат таму. Тој го помина времето, рече организацијата, „во ќелија од 2×3 метри, изолиран 23 часа на ден“.
Асанж требаше повторно да се сретне со неговата сопруга Стела, која на Икс потврди дека е слободен. Таа им се заблагодари на поддржувачите на Асанж, велејќи „зборовите не можат да ја изразат нашата огромна благодарност“.
На видеото на Викиликс, Асанж е облечен во кошула и фармерки со кратка бела коса и се гледа како се качува по скалите во авион.
JULIAN ASSANGE IS FREE
— WikiLeaks (@wikileaks) June 24, 2024
Julian Assange is free. He left Belmarsh maximum security prison on the morning of 24 June, after having spent 1901 days there. He was granted bail by the High Court in London and was released at Stansted airport during the afternoon, where he boarded a…
Договорот за признавање вина доаѓа неколку месеци откако американскиот претседател Џо Бајден рече дека го разгледува барањето од Австралија да се откаже од американскиот притисок за кривично гонење на Асанж.
Викиликс во 2010 година објави стотици илјади доверливи американски воени документи за војните на Вашингтон во Авганистан и во Ирак, што беше најголемото протекување безбедносни документи од ваков вид во американската воена историја. Заедно со тоа објави и делови од дипломатски телеграми.
Асанж беше обвинет за време на администрацијата на поранешниот претседател Доналд Трамп поради објавувањето на документите, кои беа обелоденети од Челзи Менинг, поранешна американска воена разузнавачка аналитичарка, која исто така беше обвинета според Законот за шпионажа.
Многу застапници за слободата на печатот тврдат дека кривичното обвинение за Асанж претставува закана за слободата на говорот.