На дводневното рочиште во Високиот суд ќе се разгледа дали Асанж роден во Австралија, кој речиси пет години се наоѓа во затворот Белмарш, може да добие дозвола за жалба против одлуката за екстрадиција донесена во 2022 година
Адвокатите на основачот на Викиликс Џулијан Асанж денеска започнуваат процес што би можел да биде негов последен обид да избегне екстрадиција во САД каде што се соочува со судење и долги затворски казни за оддавање воени тајни.
На дводневното рочиште во Високиот суд ќе се разгледа дали Асанж роден во Австралија, кој речиси пет години се наоѓа во затворот Белмарш, може да добие дозвола за жалба против одлуката за екстрадиција донесена во 2022 година од тогашната министерка за внатрешни работи, Прити Пател.
Адвокатите на Асанж се очекува да тврдат дека одлуката ќе ја прекрши европската конвенција за човекови права, вклучително и неговото право на слободен говор.
Доколку не ги убедат судиите дека нешто не е во ред со таа наредба, Асанж мора да биде екстрадиран во рок од 28 дена.
Поддржувачите на основачот на Викиликс велат дека тој открил неправилности, но според САД, Џулијан Асанж загрозил многу животи.
Маратонската правна битка на Асанж започна во 2010 година кога Викиликс откри мноштво доверливи воени документи од војните во Ирак и Авганистан.
САД во 2019 година бараа негова екстрадиција од Велика Британија велејќи дека неговите откритија ги ставиле во опасност животите на луѓето.
Правните битки на Асанж започнаа во 2010 година, по што тој помина седум години во амбасадата на Еквадор во Лондон, пред да биде екстрадиран и затворен во 2019 година поради прекршување на условите за неговото ослободување. Оттогаш тој е во најстрогиот затвор во југоисточен Лондон, каде дури и се ожени.
Британија ја одобри неговата екстрадиција во САД во 2022 година, откако судијата првично ја суспендираше поради загриженост за менталното здравје на Асанж или ризикот од самоубиство доколку биде депортиран.
Две години подоцна, британски судија пресуди дека иако САД покажаа дека имаат легитимно кривично дело против Џулијан Асанж, тој не може да биде екстрадиран бидејќи може да се обиде да си наштети.
Америка подоцна ја поништи таа пресуда откако и даде на Велика Британија нови гаранции дека Асанж ќе биде третиран хумано, вклучително и можност тој да ја одлежи евентуалната затворска казна во неговата родна Австралија. Нивните адвокати, исто така, постојано ги негираа тврдењата од кампањата на Асанж дека тој може да биде осуден на 175 години затвор.
Говорејќи за Би-би-си, Стела Асанж вчера рече дека нејзиниот сопруг нема да преживее во американски затвор и дека случајот е политички мотивиран.
„Овој случај ќе утврди дали ќе преживее или ќе умре“,
рече таа.
Џулијан Асанж се наоѓа во лондонскиот затвор Белмарш од 2019 година, додека трае случајот со барањето на САД за негова екстрадиција.