Во пресрет на мировната конференција во Швајцарија, на која Русија не беше поканета, Путин наведе низа услови кои се во целосна спротивност со условите поставени од Украина
Рускиот претседател Владимир Путин денеска изјави дека Русија ќе го прекине огнот и ќе влезе во мировни преговори доколку Украина се откаже од своите амбиции да се приклучи на НАТО и кога ќе ги повлече своите сили од четирите украински региони кои Москва ги смета за свои.
Во пресрет на мировната конференција во Швајцарија, на која Русија не беше поканета, Путин наведе низа услови кои се во целосна спротивност со условите поставени од Украина.
„Условите се многу едноставни. Штом Киев изјави дека е подготвен за таква одлука и ќе започне со вистинско повлекување на силите од овие региони, а исто така официјално објави дека се откажува од плановите за влез во НАТО, од наша страна, веднаш, буквално во истиот момент ќе стигне наредбата за прекин на огнот и почеток на преговорите“,
рече Путин наведувајќи го целосното повлекување на украинските сили од целата територија на регионите Донецк, Луганск, Херсон и Запорожје во источна и јужна Украина.
Повторувам, додаде тој, тоа ќе го направиме веднаш.
„Се разбира, во исто време ќе гарантираме непречено и безбедно повлекување на украинските единици и формации“,
изјави Путин.
Украина експресно го отфрли предлогот
Украина експресно и категорично го отфрли предлогот на Путин. Имено, советникот на украинскиот претседател Володимир Зеленски, Михаило Подољак, во изјава за Ројтерс рече дека Украина нема да ги прифати условите за почеток на преговорите за завршување на војната што ги претстави рускиот претседател Владимир Путин.
Тој го отфрли предлогот на Путин оценувајќи дека тоа не е сериозен обид за постигнување мировен договор и дека не е релевантен за никакви преговори.
Подољак додаде за Ројтерс дека нема можност да се најде компромис меѓу изјавите на Путин и условите за крај на војната што ги претстави Украина.
Голем самит во Швајцарија
Во третата година од војната, Русија контролира речиси една петтина од територијата на Украина. Украина вели дека мирот може да се заснова само на целосно повлекување на руските сили и обновување на територијалниот интегритет на Украина.
Се очекува викендов, на самитот во Швајцарија на кој ќе присуствуваат претставници на повеќе од 90 земји и организации, да се избегнат територијалните прашања и наместо тоа фокусот да се стави на прашања како што се безбедноста на снабдувањето со храна и нуклеарната безбедност во Украина.
Кремљ соопшти дека средбата би била залудна без руски претставник.