Повеќе од 19 000 компании досега поднеле барања до Управата за јавни приходи за мерката за исплата на финансиска поддршка за исплата на платите за април и мај во износ до 14 500 денари месечно по вработен, информира денеска министерот за економија Крешник Бектеши.
„Дека мерките се фокусирани да ги дадат најдобрите резултати врз економијата покажува и големиот интерес на компаниите и граѓаните за нивното користење. Радува што заклучно со денеска над 19 000 компании поднеле барања за мерката за финансиска поддршка за исплата на платите за април и мај во износ до 14 500 денари месечно по вработен“,
рече Бектеши на денешната прес-конференција во Владата.
Како што кажа Бектеши, аплицирањето за оваа мерка започна на 1 мај, а крајниот рок истекува утре на 7 мај во 24 часот.
„Со оваа мерка се овозможува континуитет на работните процеси и се обезбедува основа за редовна исплата на плати и придонеси при што се создаваат сериозни услови за да се зачуваат работните места“,
потенцира Бектеши.
Според последната одлука на Владата, работодавачот што ќе користи мерка за субвенционирање на исплата на придонеси од задолжително социјално осигурување не смее да го намали бројот на вработени во април 2020 година, како и два месеци по нејзиното престанување (заклучно со август 2020 година), освен во оправдани услови дефинирани во законот за работни односи, како пензионирање или откажување на договор од страна на работникот, но не повеќе од утврдениот процент.
Бектеши информираше и дека спроведен е јавниот повик за субвенции за печки на пелети. Како што кажа тој, оваа година субвенции ќе добијат 454 домаќинства кои аплицирале до 6 март.