На прашање на „360 степени“ дали може да потврди дека пријавителот направил снимка на која се слушаат гласовите на осомничените (врховниот судија Наке Георгиев и членот на Советот на јавни обвинители, Иџет Мемети), државниот обвинител Љупчо Коцевски индикретно како да го потврди тоа, без да каже детали
Тече истрагата за случајот во кој првосомничен е врховниот судија Наке Георгиев, а второосомничен е членот на Советот на јавните обвинители, Иџет Мемети – за примање награда за противзаконито влијание. Кривичниот суд го испрати Георгиев во триесетдневен притвор, а на Мемети му го одзема пасошот.
Сето ова по пријава на синот на поранешниот градоначалник на Ново Село, Боро Стојчев, познат како Боро Марлборо, за кого, според пријавата, осомничените ветувале погодности во кривична постапка, а судијата Наке Георгиев бил фатен на лице место со обележани 10 илјади евра.
Синот на Боро Марлборо случајот го пријави во полиција, а државниот јавен обвинител Љупчо Коцевски во интервју за „360 степени“ на МРТ 1 не сакаше да претпоставува зошто пријавителот не се обратил до Обвинителството.
360֯ : Обвинителе, тоа што ова е сепак акција на МВР, како го доживувате како Јавно обвинителство? Зошто синот на засегнатиот не дошол да приjaви во Обвинителството, туку приjaвил во полиција? Поврзано ли е со нивото на довербата?
Коцевски: Не можам тоа да го објаснам. Тоа е можеби убедување на подносителот, можеби повеќе имал доверба во полицијата или поради брзината на дејствувањето, можеби тоа влијаело. Меѓутоа, не можам да кажам дека немал доверба во Обвинителството. Во тој поглед морам да нагласам дека веќе формирав Одделение за заштитно пријавување, со тоа што секој кој има влијание од политичар, бизнисмен или евентуално коруптивно кривично дело, може да пријави, ќе има надлежен обвинител…
Во однос на формулацијата од соопштението на Обвинителството дека првосомничениот, врховниот судија Георгиев, „лажно ветувал погодности за обвинет“ и „лажно прикажале дека ќе извршат влијание со второосомничениот“, Коцевски вели:
„Во моментот кога јавниот обвинител го формулира описот на дејствијата, тоа произлегува од прибраните докази и доказите што ги поднел пријавителот. Пријавителот во конкретниот случај е синот на обвинетиот кој склучил спогодба со обвинителството и таа спогодба требало да ја одобри судот. Не може Јавното обвинителство однапред да тврди дека тоа било навистина така затоа што начинот на којшто влијаел или не влијаел, ќе се докажува во текот на постапката и првата квалификација е за член 359 – примање награда за противправно влијание. Натаму ќе видиме дали ќе остане ова дело или ќе има друга квалификација. Обезбедени се доказите, ќе се распрашаат сите“.
360°: Народски кажано, можно ли е да му ги земале парите, лажејќи го дека можат да влијаат на судија во Основниот кривичен суд?
Коцевски: Значи, сè е можно, ништо не се исклучува.
На прашање на „360 степени“ дали може да потврди дека има снимка на која се слушаат гласовите на осомничените, државниот обвинител индикретно како да го потврди тоа, но не сакаше да каже детали.
Коцевски: Сите докази за да имаат правна сила мора да се обезбедат на законит начин. На ова прашање дали има и кој доказ, ќе цени јавниот обвинител што е обработувач на предметот.
360°: Теоретски, ако има снимка направена од пријавителот, дали таа може да биде доказ во постапката?
Коцевски: Знаете, само во одредени случаи, кога, еве, имаше малолетно дете со дадилка, затоа што тоа не може да сведочи, тоа е немоќно лице, тогаш снимките може евентуално да бидат доказ. Меѓутоа, овде не можам да ви кажам во оваа фаза што ќе биде проценка на јавниот обвинител.