Владата на денешната седница ја констатираше оставката на директорот на Фондот за здравство, Ден Дончев, велат владини извори.
Според образложението, Дончев оставката од директорското место во Фондот ја поднел поради здравствени и семејни причини.
Дончев стана директор во август 2017 година. Тој на парламентарните избори во 2016 г. беше носител на листата во првата изборна единица од коалицијата „ВМРО за Македонија“ и важи за близок до ексминистерот за внатрешни работи Љубе Бошкоски.
Беше генерален секретар на ВМРО-ДПМНЕ кога Никола Груевски го презеде раководењето на партијата, но по несогласувањата со него ја напушти партијата и подоцна се приклучи и беше активен во Обединети за Македонија.
Во мандатот на Љубчо Георгиевски, Ден Дончев беше директор и на „Македонски телеком“.
Инаку, во текот на раководењето со Фондот за здравство, опозицијата го споменуваше како активен учесник во аферата која ја нарече „Рекет 2“.