Во писмото до израелскиот министер за надворешни работи Израел Кац, министрите го истакнале правото на Израел на самоодбрана и ги осудиле терористичките напади на Хамас и другите исламистички групи на 7 октомври. Истовремено, тие ја повикале владата на премиерот Бенјамин Нетанјаху да направи се што е во нејзина моќ за да ја ублажи катастрофалната и влошена хуманитарна криза во Појасот Газа
Министрите за надворешни работи на 13 земји, во заедничко писмо го предупредиле Израел за сеопфатната воена офанзива врз градот Рафах во јужниот дел на Појасот Газа, се вели во извештајот на медиумите. Германскиот весник „Зидојче цајтунг“ објави дека потписниците исто така повикале на поголема помош за палестинското население. Сите земји од Г-7, група на големи индустријализирани земји, го потпишаа писмото на четири страници, освен Соединетите Држави.
Во писмото до израелскиот министер за надворешни работи Израел Кац, министрите го истакнале правото на Израел на самоодбрана и ги осудиле терористичките напади на Хамас и другите исламистички групи на 7 октомври. Истовремено, тие ја повикале владата на премиерот Бенјамин Нетанјаху да направи се што е во нејзина моќ за да ја ублажи катастрофалната и влошена хуманитарна криза во Појасот Газа.
Според извештајот на „Зидојче цајтунг“, тие исто така го повикале Израел да ги отвори сите гранични премини во крајбрежната зона за испорака на помош, вклучувајќи го и преминот Рафах со Египет.
Пред нешто повеќе од една недела, израелската армија напредуваше од исток кон Рафах и покрај силните меѓународни предупредувања. Оттогаш, армијата го контролира и палестинскиот дел од граничниот премин Газа кон Египет. Важниот граничен премин оттогаш е затворен за хуманитарна помош. Израел и Египет меѓусебно се обвинуваат за ова.
Писмото го потпишале министрите за надворешни работи на земјите од Г7 на Германија, Франција, Велика Британија, Италија, Јапонија и Канада и нивните колеги од Австралија, Данска, Финска, Холандија, Нов Зеланд, Јужна Кореја и Шведска.
Израелскиот министер за одбрана Јоав Галант, вчера најави распоредување дополнителни трупи во Рафах. Таму веќе се погодени стотици цели и уништени се неколку тунели, соопшти израелската армија. Според ОН, околу 600 000 луѓе веќе го напуштиле градот на границата со Египет.