Канцеларијата на Косово во владата на Србија соопшти дека челникот на српската црква во понеделникот тргнал кон Косово за да учествува на Светиот архиерејски синод на СПЦ во Пеќската патријаршија, но кога стигнал до преминот „Мердаре“ бил спречен да влезе на косовска територија поради забраната наложена од Приштина
Властите на Косово вчера му забранија влез во земјата на поглаварот на Српската православна црква (СПЦ), патријархот Порфириј. Информацијата ја соопшти шефот на Канцеларијата за Косово во српската влада, Петар Петковиќ, а подоцна ја потврди и Министерството за надворешни работи и дијаспора на Косово.
Канцеларијата на Косово во владата на Србија соопшти дека челникот на српската црква во понеделникот тргнал кон Косово за да учествува на Светиот архиерејски синод на СПЦ во Пеќската патријаршија, но кога стигнал до преминот „Мердаре“ бил спречен да влезе на косовска територија поради забраната наложена од Приштина.
„Српскиот патријарх, господин Порфириј, секогаш, во секоја прилика и на секое место, со своите пораки, нежни зборови и постапки повикуваше на мир и соживот на Србите и Албанците на просторот на Косово и Метохија. За жал, овие се вредности и пораки кои денес никој во Приштина не ги разбира“,
гласеше, меѓу другото, соопштението на шефот на Канцеларијата за Косово во српската влада, Петар Петковиќ.
Во контекст на забраната за влез на патријархот Порфириј во Косово, тамошните власти соопштија дека такви посети нема да бидат дозволени сè додека „Србија продолжи да го прекршува Бриселскиот договор, не дозволува посети на косовските државни функционери во Србија и не ги прекине кампањите против Косово во меѓународната арена, и во процесот на интеграција и во процесот на препознавање“.
Забраната на косовските власти за влез на поглаварот на СПЦ предизвика бројни реакции во Белград, при што најчеста оценка е дека тоа е „срамен“ и „нецивилизиран чин“, и „уште еден во низата потези со кои Приштина ја покажува својата позиција и нетрпеливост кон Србите и Белград“. СПЦ ја оквалификува одлуката како „неразумна“
Во декември 2022 година Порфириј доби забрана од Приштина да оди во Патријаршијата во Пеќ за Божиќ, но на 5 јануари премиерот Албин Курти ја тргна забраната на барање на министерот за враќање и заедници, Ненад Рашиќ.