Во низата реакции по свечената изјава на претседателката Гордана Силјановска-Давкова се приклучија и од коалицијата „Вреди“, од каде што велат дека претседателот мора да биде пример за почитување на Уставот, особено кога станува збор за професорка по уставно право
Коалицијата „Вреди“ преку соопштение реагира на денешната инаугуративна седница во Собранието, на која претседателката на државата Гордана Силјановска-Давкова, при давањето свечена изјава, не го употреби уставното име на земјава. Од „Вреди“ велат дека не треба да се отвораат стари рани и дека претседателот треба да биде пример за останатите кога станува збор за почитување на Уставот.
„Изразуваме загриженост што емоциите од кампањата влијаат на рационалноста во првите чекори во реал-политиката. Имаме разбирање за чувствата на македонскиот народ, но нема втора шанса за прв впечаток за новата шефица на државата. Претседателот на Републиката мора да биде пример за почитување на Уставот, особено кога станува збор за професорка по уставно право“,
соопштија од „Вреди“.
Дополнително, велат од „Вреди“, Северна Македонија е полноправен член на НАТО и е земја која веќе ги отпочна преговорите со Европската Унија, но и земја на која ѝ претстојат уставните измени за да продолжи по европскиот пат.
„Не ни треба отворање на старите рани. Затоа, добро е што новата претседателка ја потпиша заклетвата со уставното име, што сепак е знак дека реалноста де факто е прифатена од неа“,
велат оттаму.
Претходно денеска регираа од ДУИ со оценка дека новата претседателка го згазила Уставот уште во првата реченица не спомнувајќи ‘Република’, ниту ‘Република Северна Македонија’, со сите импликации кои ги има тоа. Министерот за правда, Кренар Лога, пак, отиде чекор понатаму, велејќи дека заклетвата е ништовна и дека или треба да се повтори или функцијата да ја преземе претседателот на Собранието.
Експресно реагираше и Грција со повлекување на амбасадорката Софија Филипиду од инаугуративната собраниска седница, а подоцна и со соопштение на Министерството за надворешни работи во Атина. Грчкото МНР оцени дека Силјановска-Давкова грубо ги прекршила Договорот од Преспа и Уставот на земјава.
Реакции пристигнаа и од претседателите на Европскиот совет и на Европската комисија, Шарл Мишел и Урсула фон дер Лајен. Според нив, напредокот на Северна Македонија кон ЕУ зависи и од целосно почитување на меѓународно обврзувачките договори, како што е Преспанскиот договор.