Полицијата уапси десетици демонстранти на протестите што се одржуваат во кампусите на повеќе универзитети во Соединетите Американски Држави, со кои се бара прекин на огнот во Газа, како и замрзнување на американската воена помош за Израел
Десетици пропалестински демонстранти беа уапсени во неколку американски универзитетски кампуси, додека активистите велат дека ќе продолжат да маршираат за прекин на огнот во војната на Израел со Хамас, пренесе „хрт.хр“.
Полициската управа на Универзитетот во Индијана, „Блумингтон“, соопшти дека таму биле уапсени 23 демонстранти под обвинение за отпор при апсењето.
„Полицијата на Универзитетот во Индијана продолжува да ги поддржува мирните протести во кампусот кои ја следат универзитетската политика“, се вели во соопштението на полицијата.
Пропалестинските протести се проширија во повеќе универзитетски кампуси низ САД, предизвикани од масовното апсење на повеќе од 100 луѓе во кампусот на Универзитетот „Колумбија“ минатата недела.
Заедно со прекинот на огнот, демонстрантите бараат нивните училишта да се одделат од компании поврзани со израелската војска и бараат замрзнување на американската воена помош за Израел и амнестија за студентите и членовите на факултетите што добија дисциплински казни или се отпуштени поради протестите.
Надлежните на неколку универзитети побараа од полицијата да ги расчисти логорите и да ги уапси оние кои одбиваат да ги напуштат, велејќи дека го бранат правото на слободен говор на протестите, но дека нема да прифатат активисти кои ги прекршуваат политиките на кампусот против говорот на омраза или кампуваат на универзитетски терени.
Државната полиција на Масачусетс соопшти дека уапсила 102 демонстранти кои одбиле да заминат од Универзитетот „Нортистерн“ во Бостон.
На Државниот универзитет во Аризона полицијата вчера уапси 69 демонстранти за кои велат дека се „група луѓе од кои повеќето не се студенти или универзитетски персонал“.