До Агенцијата за вработување се поднесени околу 3.900 барања за користење на надоместокот во случај на невработеност, рече вицепремиерката Мила Царовска во емисијата „Трилинг“ на телевизија 24.
„Досега решени се 1.800 барања, а 1.900 се во обработка, додека само 100 се негативни, што значи дека има поднесено ваков тип на барања и позитивно се решаваат во најголем дел и тој систем на поддршка си продолжува за работниците“,
рече Царовска и додаде дека бројот на изгубени работни места поради корона-кризата не е драстичен.
Според неа, ова е и показател дека системите се подготвени да излезат во пресрет онаму каде што ќе се јави предизвик одредено лице да влезе во длабока сиромаштија, заради невработеност, државата да излезе во пресрет.
„Замислете ги оние 12.000 стечајци сега да немаа никаков приход. Замислете ги оние 30.000 домаќинства во систем на социјална заштита сè уште да беа на 3.000 денари, наместо денешните 10.000 денари. Мислам дека целиот систем досега поддржа голема група на граѓани и без кризата и сега затоа ударот по кризата ќе биде помал за нив“,
рече Царовска.
Таа информираше дека во тек се разговори и консултации со синдикатите, граѓанските здруженија и претставници од Владата за да се направи баланс меѓу работодавачите и работниците во уредбите коишто ги носи Владата.
„Целта е двете страни да имаат придобивка од мерките коишто ги носиме и јас сум сигурна дека ќе постигнеме таков договор, се со цел да можеби одредена фирма досега ако отпуштила работници, да може да ги оствари субвенциите за да може да ги задржи останатите вработени. Секако и вработените да добијат одредени бенефиции или одредена поддршка од страна на државата“,
рече Царовска.