Три лица од Дебар се приведени поради непочитување на забраната за движење во текот на изминатото деноноќие.
„Во текот на изминатото деноноќие за време на спроведувањето на мерките за ограничено движење и заштита на граѓаните од ширење на коронавирус, на подрачјето кое го покрива Одделението за внатрешни работи од Дебар, три лица не ја почитувале забраната за движење. Тие се приведени и против нив ќе бидат поднесени кривични пријави по членот 206 од Кривичниот законик“,
потврди Стефан Димоски, портпарол на Секторот за внатрешни работи од Охрид.
Додава дека во истиот период, не се евидентирани нарушувања на јавниот ред и мир, кражби и сообраќајни незгоди.
Според податоците на СВР Охрид во општините под нивна надлежност, најдоследни во почитувањето на забраната за движење се жителите од општините Дебар и Центар Жупа.
Полициската статистика потврдува дека по повеќе од еден месец првите прекршувања се регистрирани на 29 април кога забраната за движење ја прекршиле две, а во следните денови тоа го направиле седум лица.