Според претседателската кандидатка поддржана од Левица, ова претставува потенцијална можност работодавците во приватните компании да им оневозможат на своите вработени да го напуштат работното место за да излезат да гласаат
Претседателската кандидатка поддржана од Левица, Билјана Ванковска-Цветковска, ја оцени како неправедна одлуката на Владата деновите на одржување на изборите (24 април и 8 мај) да бидат неработни само за јавната администрација во државата.
Според Ванковска, тоа е нефер услов и потенцијална можност работодавците во приватните компании да им оневозможат на своите вработени да го напуштат работното место за да излезат да гласаат.
„Го добивме известувањето од Владата за денот на гласањето, кој е слободен ден само за јавната администрација. Сметам дека тоа е неправедно, не е фер услов. Практично, сите приватни работодавачи ќе можат да им оневозможат на граѓаните да го напуштат работното место, да излезат да гласаат, зависно од нивните околности“,
рече Ванковска-Цветковска на средба со граѓани од Општина Центар.
Согласно ваквата владина одлука, според неа, голем број граѓани, особено оние што потекнуваат од градовите во внатрешноста, а се со престој во Скопје, нема да бидат во можност да го остварат своето право на глас.
Владата минатата недела донесе одлука според која 24 април и 8 мај – денот на одржување на првиот круг од претседателските и денот кога ќе се гласа на вториот круг и на изборите за пратеници – ќе бидат неработни. За работодавците од приватниот сектор ова важи како препорака за спроведување на ваквата одлука.