„Клучно за развојот на сите млади лекари е да им пренесуваме знаење. Но, тоа не е доволно. Потребно е тие да бидат соодветно платени за својот труд. Од нивната работа зависи и здравјето на граѓаите денес и во иднина“, вели поранешниот министер за здравство
Ги поддржувам барањата на приватните специјализанти за покачување на примањата, согласност растот на платите. Ова денеска на неговиот фејсбук-профил го напиша поранешниот министер за здравство Венко Филипче, посочувајќи дека приватните специјализанти го бараат само она што и го заслужуваат.
„Обезбедувањето на плата на приватните специјализанти за прв пат во историјата беше плод на мојата соработка со нив додека бев министер. Одлуките за нивните права и барања секогаш ги носевме заедно во еден инклузивен процес. Тоа така мора да продолжи и во иднина. Приватните специјализанти треба да бидат платени и понатаму во согласнот со растот на платите на лекарите“,
напиша Филипче.
Посочувајќи ја фотографијата која ја објави заедно со напишаното, а на која се гледа како тој е во тек на операционен зафат, а му помагаат две специјализантки, кои му асистираат, Филипче вели дека колешките кои работеле со него на операцијата се специјализантките Катерина и Марина.
„Клучно за развојот на сите млади лекари е да им пренесуваме знаење. Но, тоа не е доволно. Потребно е тие да бидат соодветно платени за својот труд. Од нивната работа зависи и здравјето на граѓаите денес и во иднина“,
рече тој.
Инаку, за 27 март е најавен протест пред Министерството за здравство на младите лекари и приватните специјализанти под мотото „Достоинство за младите лекари“.
Причините за протестот се, како што велат платите на приватните специјализанти, кои не се опфатени со ниту едно покачување во здравството и изнесуваат 26 илјади денари.
Како што посочуваат, приватните специјализанти останале и без здравствено осигурување, кое им било укинато без никакво образложение.
Филипче во мај 2021 година најави дека сите приватни специјализанти ќе добијат целосно здравствено осигурување, со што ќе се реши досегашниот проблем на оваа категорија млади лекари.
Филипче дојде на функцијата министер за здравство во декември 2017 година, а на функција остана до крајот на 2021 година.
Во магазинско издание од 7 март, „360 степени“ објави анализа на имињата на можните носители на партиските листи во секоја изборна единица поединечно.
Според анализата, во четвртата изборна единица можен е политички камбек на поранешниот министер за здравство Венко Филипче како носител на листата на СДСМ. Неговото враќање по двегодишна пауза, токму во т.н. струмичко-прилепска единица, се поврзува со помирувањето меѓу експартискиот шеф Заев и актуелниот лидер Ковачевски. Филипче важи за човек од доверба на Заев со кого го врзува и лично пријателство – често може да се видат заедно, делат и хоби – возење мотоцикли.
Лидерот на СДСМ, Димитар Ковачевски денеска не ги откри имињата на носителите на листи за парламентарните избори.
СДСМ на 23 март, в сабота, ќе одржи Конгрес на кој ќе ја претстави програмата и партиските листи кои ќе учествуваат на претстојните парламентарни избори.