Од КСС посочуваат дека еден од проблемите што ескалира во последните неколку дена е прекинувањето на работните односи на илјадници работници
Конфедерацијата на слободни синдикати на Македонија (КСС) изразува загриженост за, како што велат, лошите економски и социјални состојби во државата, особено за поголемиот дел од работниците чии месечни примања не обезбедуваат ниту минимален животен стандард за нивните семејства. Оттаму најавуваат дека соодветно ќе одговорат на политиките кон работниците доколку, како што велат, Владата не покаже слух за предупредувањата за ситуација со стандардот и правата на вработените.
„Загриженоста на КСС е уште пооправдана ако се има предвид фактот дека сѐ повеќе работници го губат своето работно место, а економските показатели покажуваат постојано влошување на состојбите, што е сосема спротивно од очекувањата, а особено и ветувањата на Владата“,
соопштија од КСС.
Оттаму посочуваат дека континуирано укажувале и барале итно да се најдат решенија за надминување на ваквите состојби, но, за жал, додаваат, одговорните државни органи не преземаа доволно сериозни мерки за излез од оваа ситуација.
„Особено е неприфатлив односот на најголемиот дел од државните органи, особено во делот на социјалниот дијалог и партнерство во време на пандемија кога сите заедно треба да помогнеме што побрзо да се стави крај на ваквите штетни влијанија врз економскиот и социјалниот живот на граѓаните“,
потенцираат од КСС.
Според КСС, земјава станала единствен пример во регионот и пошироко, каде што местото и улогата на синдикатите кои се регулирани со највисоки меѓународни документи (конвенции), како и со највисоки правни документи во нашата држава (Устав и Закон за работни односи) целосно не се почитуваат од страна на Владата.
„Еден од проблемите што ескалира во последните неколку дена е прекинувањето на работните односи на илјадници работници, а Владата со нејаснотијата и хаосот што ги прави со уредбите што ги носи, само придонесува овој проблем да се зголемува и да создава уште поголем страв кај сите работници во однос на нивниот економски и социјален статус“,
велат од КСС
Наместо поефикасно да се справуваме со пандемијата, велат од КСС, и во делот на солидарноста за зачувување на работните места и во делот на заштита и безбедноста на работните места, па и заштита на сите граѓани во државата, ние од ден на ден слушаме за едни исти уредби со спротивставени насоки, што секако носи несигурност кај секого од нас. Од КСС, како што велат, се надеваат дека овие пораки ќе бидат сфатени од сите одговорни органи или поединци на сите нивоа на функционирање на власта.
„Во спротивно, во името на солидарноста, уште еднаш предупредуваме како вистински заштитник на работниците многу брзо ќе одговориме на соодветен начин, но овој пат со сите работници што ги губат работните места, затоа што во времето што помина и времето што доаѓа се повеќе се препознава вистинскиот синдикат и вистинските и искрени борци за работничките права“,
наведуваат од КСС.