Бајден ги истакна своите разлики со Трамп за демократијата, правата на абортусот, имигрантите и економијата за време на говорот што демократите го гледаат како главна можност за претседателот да добие поддршка за втор мандат
Американскиот претседател Џо Бајден говорејќи синоќа на заедничката седница на Претставничкиот дом и Сенатот оцени дека демократијата е загрозена и го нарече ставот на поранешниот претседател Доналд Трамп за НАТО како неприфатлив.
„Слободата и демократијата се загрозени. Никогаш нашата слобода и демократија не биле во таква опасност во нашата земја како што се денес“,
рече тој.
Во своето обраќање Бајден го обвини Трамп дека му се поклонува на рускиот претседател и го критикуваше за неговиот повик до Путин да ги нападне земјите од НАТО кои не успеваат да дадат доволно финансиски придонеси за алијансата.
„Опасно е и неприфатливо. Мојата порака до претседателот Путин, кој го познавам долго време, е едноставна. Нема да заминеме. Нема да се поклониме. Нема да се поклонам. Сега мојот претходник, поранешен републикански претседател, му вели на рускиот претседател Владимир Путин, цитирам: ’Прави што сакаш’. Мислам дека тоа е безобразно, опасно и неприфатливо“,
рече Бајден.
Во говорот Бајден повторно побара од Конгресот да ја поддржи Украина да го запре Путин во неговата инвазија.
„Можам да ве уверам дека Путин нема да запре на Украина. Но, Украина може да го запре Путин ако ја поддржиме и ѝ го обезбедиме оружјето што ѝ е потребно за да се одбрани“,
рече тој повикувајќи го Конгресот да дозволи помош за Киев, која е замрзната со месеци поради партиски судири меѓу демократите и републиканците.
Официјалното обраќање пред двата дома на американскиот Конгрес традиционално му дава можност на американскиот претседател да зборува за состојбата на земјата и приоритетите за иднината.
Бајден ги истакна своите разлики со Трамп за демократијата, правата на абортусот, имигрантите и економијата за време на говорот што демократите го гледаат како главна можност за претседателот да добие поддршка за втор мандат.
Зборувајќи за тековната војна во Газа, Бајден повика на итен шестнеделен прекин на огнот и го предупреди Израел дека прашањето за хуманитарната помош за Газа не може да биде второстепено прашање или за пазарење за постигнување договор.
Тој, исто така, го информираше Конгресот дека ѝ наредил на американската војска да направи пристаниште во Газа за да испорача поголема хуманитарна помош на опколената палестинска територија.
Бајден, исто така, го поздрави приемот на Шведска во НАТО, „најсилниот воен сојуз што светот некогаш го видел“.
Одговарајќи на критиките на гласачите поради неговата возраст, Бајден рече: „На моја возраст, некои работи стануваат појасни од кога било“.
Во говорот што траеше нешто повеќе од еден час, Џо Бајден рече дека под негово водство, Америка го доживеа „најголемото закрепнување“ по пандемијата на ковид-19, која ја фрли на колена најголемата светска економија.
„Наследив економија која беше на работ на колапс. Сега на нашата економија буквално ѝ завидува целиот свет. За три години се отворени 15 милиони работни места, тоа е рекорд. А стапката на невработеност е најниска во последните 50 години“,
истакна претседателот на САД и заклучи дека тоа навестува иднина полна со ветувања.