Увид на местото на настанот направиле полицијата и основен јавен обвинител. Наредена е обдукција на телото на момчето
Момче на возраст од 14 години синоќа околу 19:30 часот било пронајдено без знаци на живот со повеќе убодни рани и надворешни крвавења во центарот на Прилеп на тротоарот од булеварот „Гоце Делчев“ наспроти Домот на културата „Марко Цепенков“, јавува МИА. Момчето, без знаци на живот, било пренесено во градската болница каде што биле безуспешни сите обиди да се реанимира.
„Во 19:35 часот добивме повик за интервенција на булеварот. Констатиравме дека лицето има повеќе надворешни крвавења, не даваше знаци на живот. Беше пренесено на одделот за анестезија и реанимација при градската болница, но сите обиди за негова реанимација беа безуспешни“,
изјавил за МИА дежурниот лекар при службата за итна медицинска помош во Прилеп.
Увид на местото на настанот направиле полицијата и основен јавен обвинител. Наредена е обдукција на телото на момчето.
„Трагичниот настан се случил во периодот од 19 до 20 часот. Според првичните сознанија, момчето било нападнато со остар предмет, сѐ уште не се знае дали од едно или повеќе лица. Било нападнато пред Деветокатницата во центарот на Прилеп. Пронајдено е со многу крвави убодни рани на тротоарот на булеварот ‘Гоце Делчев’. Веројатно се обидело да се оддалечи од местото на нападот. Наредена е обдукција на телото за да се констатираат причините за смртта“,
изјавил за МИА основниот јавен обвинител Стевчо Биноски.