„Се соочивме со две закани – прво, обид за испраќање пари без контролни механизми и второ, загриженост дека парите на унгарскиот народ може да завршат во Украина. Денеска успеавме да ги избегнеме двете закани“, изјавил Балаш Орбан, политичкиот директор во кабинетот на Орбан (не се во роднинска врска), објаснувајќи го од унгарска перспектива договорот на лидерите на ЕУ за пакетот финансиска помош за Украина
Унгарскиот премиер Виктор Орбан, по неколкучасовен молк, се огласи на социјалните мрежи по договорот кој лидерите на ЕУ денеска успеаја да го постигнат во врска со пакетот финансиска помош за Украина од 50 милијарди евра.
Пред состанокот, сите очи беа вперени кон Орбан бидејќи постоеја стравувања дека унгарскиот премиер може повторно да ја блокира помошта за Украина, како што тоа веќе еднаш го стори на самитот на Унијата во декември лани, што предизвика фрустрации кај останатите земји членки.
Орбан во своето кратко обраќање, пренесува „Гардијан“, го поздравил договорот, истовремено посочувајќи дека Унгарија успеала да оствари победа на денешниот специјален состанок на Советот на Европската Унија.
Тој рекол дека Унгарија преговарала за „контролен механизам“ кој ќе гарантира „разумна употреба на парите“ за Украина.
„Добивме гаранција дека парите на Унгарија нема да завршат во Украина“,
додал тој.
Унгарскиот премиер, исто така, рекол оти е среќен што пазарите позитивно реагирале на договорот.
Толкување на исходот од денешниот самит на лидерите во Брисел дал и Балаш Орбан, политичкиот директор во кабинетот на Орбан (не се во роднинска врска), кој рекол дека во однос на договорот за Украина, неговата земја се соочила со две закани.
„Се соочивме со две закани – прво, обид за испраќање пари без контролни механизми и второ, загриженост дека парите на унгарскиот народ може да завршат во Украина. Денеска успеавме да ги избегнеме двете закани. На крајот на првата година мора повторно да се преговара за помошта за Украина, а на крајот на втората година целото прашање ќе се преиспита во контекст на буџетот на ЕУ за следниот период. Фондовите на Унгарија од ЕУ ќе останат кај нејзиниот народ, при што Европскиот совет гарантира фер процедури за преговори за пристап до нив. За да се спротивстави на провоените чувства во Брисел, народот на Европа мора да се обедини, да работат заедно за да донесат промени на претстојните избори за Европскиот парламент“,
го пренесува „Гардијан“ објаснувањето на Балаш Орбан.
Сепак, како што наведува весникот, неговиот коментар се разликува од она што лидерите на земјите членки на ЕУ формално го договориле денеска во Брисел.
Имено, во заклучоците од самитот, за кои се согласија сите лидери на Унијата, како што пренесуваат медиумите, се наведува дека:
„Врз основа на годишниот извештај на Комисијата за имплементацијата на помошта за Украина, Европскиот совет секоја година ќе одржува дебата за спроведувањето на помошта со цел да обезбеди насоки. Доколку е потребно, за две години Европскиот совет ќе ја покани Комисијата да даде предлог за ревизија во контекст на нова повеќегодишна финансиска рамка“
Одлуката за постигнатиот договор ја соопшти претседателот на Европскиот совет, Шарл Мишел, по што уследија пораки од претседателката на Европската комисија, Урсула фон дер Лајен, и дел од лидерите на земјите членки на ЕУ кои го поздравија исходот од денешниот самит.
„Имаме договор! Сите 27 лидери се согласија за дополнителен пакет за поддршка од 50 милијарди евра за Украина во рамките на буџетот на ЕУ. Ова значи стабилно, долгорочно и предвидливо финансирање за Украина. ЕУ презема лидерство и одговорност за поддршка на Украина, знаеме што е во прашање“,
напиша Мишел на социјалната платформа „Икс“.
Украинскиот претседател Володимир Зеленски по одлуката рече оти им е благодарен на лидерите на ЕУ за договорот за долгорочна финансиска помош за Киев, но, истовремено ги повика и да ја засилат воената помош.
Во видеообраќањето до лидерите во Брисел, украинскиот претседател рече дека одлуката за помош од 50 милијарди евра „е јасен сигнал дека Украина ќе издржи и дека Европа ќе издржи“.
„За жал, се одложува спроведувањето на европскиот план за испорака на артилериски гранати на Украина. И ова исто така е сигнал за глобалната конкуренција, во која Европа не може да си дозволи да губи. И затоа денес вашето единство е толку потребно во создавањето на Фонд за помош на Украина во рамките на нашиот Европски мировен фонд“,
рече Зеленски, пренесува „Гардијан“.