Претседателот Пендаровски на членовите на преодната влада им посакал ефикасно работење и успешно спроведување на претстојните парламентарни избори закажани за 8 мај
По завршувањето на денешниот избор на техничката влада, претседателот Стево Пендаровски во својот кабинет ги примил членовите на новиот владин состав.
Од фотографиите и видеото што до медиумите ги испрати прес-службата на претседателот, може да се забележи дека на приемот не дошле двајцата технички министри од ВМРО-ДПМНЕ, Панче Тошковски и Ѓоко Велковски, ниту, пак, дополнителните заменик-министри од редовите на опозицијата – Елена Петрова, Цветан Трипуновски и Стефан Андоновски.
Присутни се техничкиот премиер Талат Џафери, заедно со досегашните министри и заменик-министри, како и новоименуваните дополнителни заменик-министри од редовите на СДСМ.
Претседателот Пендаровски на членовите на преодната влада им посакал ефикасно работење и успешно спроведување на претстојните парламентарни избори.
Со 65 гласа „за“ и три „против“, Собранието денеска ја изгласа техничката влада, по речиси двочасовна пленарна дискусија. Премиер во преодната влада е Талат Џафери од ДУИ.
На засебна седница се констатираа и заменик-министрите, како и дополнителните заменик-министри.
ВМРО-ДПМНЕ не гласаше за изборот на влада, иако доби дваjцa министри – за внатрешни работи и за труд и социјална политика.
Со ова е комплетиран составот на техничката влада која ќе функционира до изборот на нова, по редовните парламентарни избори кои се закажани за 8 мај.
За утре во 10 часот најавено е и примопредавање на функцијата помеѓу досегашниот претседател на Владата, Димитар Ковачевски, и новиот премиер Талат Џафери.