Надлежните немаат потреба да бркаат вештерки во системот што самите не го поставиле како што треба, реагира Димитриевски во изјава за ТВ „Телма“
Сепак, тој смета дека во случајот нема политичка борба тука само различни ставови на општинскиот штаб што го раководи тој и централниот државен штаб
Ова, повеќе од јасно, е класичен монтиран случај за кој ќе ги преземам сите можни законски дејства, вели градоначалникот на Куманово, Максим Димитриевски, во изјава за ТВ „Телма“, откако директорката на Државниот здравствен и санитарен инспекторат, Иринка Сотирова-Бухова, соопшти дека во неговиот случај се утврдени серија прекршувања на законите и процедурите.
Конкретно, начинот и условите во кои се земале брисовите на кумановскиот градоначалник Димитриевски и на останатите членови на кризниот штаб, неправењето епидемиолошки анкети, како и транспортот од страна на Итната медицинска помош до приватни лаборатории во Скопје, се дел од неправилностите кои се утврдени за време на двата вонредни инспекциски надзора на Државниот санитарен и здравствен инспекторат (ДСЗИ).
Кај градоначалникот Димитриевски е утврдено дека го прекршил решението за домашна изолација и лекување и го напуштил местото на престој, спротивно на Законот за заштита на населението од заразни болести.
*поврзана вест По надзорот на ДСЗИ: Казна за Димитриевски од 300-600 евра, пропусти и кај Брзата помош и во ЦЈЗ
„Јасно е дека надлежните институции направија многу пропусти, прекршија низа закони, пред се, со објавување лични податоци, во овој случај. Тоа што беше објавено денеска не е точно и за се имаме соодветна документација. Надлежните немаат потреба да бркаат вештерки во системот што самите не го поставиле како што треба да биде. Ова е, повеќе од јасно, класичен монтиран случај за кој ќе ги преземам сите законски дејства. Ќе ги почитувам одлуките на институциите“,
вели Димитриевски.
Сепак, тој смета дека во случајот нема политичка борба тука само различни ставови на општинскиот штаб што го раководи тој и централниот државен штаб.