За инцидентите на протестот од неделата, опозициската коалиција „Србија против насилството“ ја обвини власта, велејќи дека испратила свои хулигани, а оти ги искористила немирите за да се справи со мирните демонстранти. Нагласуваат дека во инцидентите не учествувале нивните поддржувачи, кои полицијата ги сомничи за насилничко однесување
„Ослободете ги сите“ – беше главната порака која стотици граѓани вечерва, на покана на опозициската коалиција „Србија против насилството“ ја испратија од пред зградата на Градското собрание во Белград, барајќи ослободување од уапсените демонстранти по инцидентите на протестите во неделата.
Претставниците на опозициската „Србија против насилството“ тврдат дека нивните поддржувачи не се одговорни за инцидентите на протестот од пред два дена и бараат нивно ослободување.
„Бараме да ги ослободат луѓето кои се политички апсени и обвинети за нешто што не направиле“,
рече Мирослав Алексиќ, еден од лидерите на коалицијата.
За инцидентите на протестот од викендот, „Србија против насилството“ ја обвини власта, велејќи дека испратила свои хулигани, а оти ги искористила немирите за да се справи со мирните демонстранти кои на протестот барале повторување на изборите одржани на 17 декември.
Нагласуваат дека во инцидентите не учествувале нивните поддржувачи, кои полицијата ги сомничи за насилничко однесување и обид за уривање на уставниот поредок.
„Тука сме да протестираме против кражбите, бараме власт во согласност со изборите. Се собравме да ги поддржиме луѓето кои мораа да бидат уапсени по наредба на Александар Вучиќ, кој води кампања против невини луѓе“,
рече Срѓан Миливојевиќ од Демократската партија.
Покрај барањето за ослободување на уапсените демонстранти, на денешниот деветти протест, српската опозиција повторно го упати барањето до Републичката изборна комисија за повторување на изборите на сите нивоа.
Секојдневните протести на српската опозиција започнаа откако матичната партија на претседателот Александар Вучиќ, СНС, прогласи целосна победа на изборите, за кои опозицијата тврди оти се украдени од власта.