Синодот на БПЦ ги повикува верниците да се молат за здравјето на патријархот
Бугарскиот патријарх Неофит е хоспитализиран во Воената медицинска академија (ВМА) во Софија поради белодробно заболување, соопшти утрово канцеларијата на Синодот на Бугарската православна црква-Бугарска патријаршија (БПЦ).
Синодот на БПЦ ги повикува верниците да се молат за здравјето на патријархот.
На својата веб-страница, БПЦ објави информација дека бугарскиот патријарх Неофит е примен на ВМА.
„Го повикуваме свештенството и верниот богољубив народ сесрдно да се молат за брзо оздравување и возобновување на првиот светител на нашата родна црква, како и да ги прифатат како веродостојни само информациите објавени од Светиот синод на БПЦ-БП,
стои во соопштението од Бугарската црква.
Инаку, ова не е првпат патријархот Неофит да биде хоспитализиран со белодробно заболување.
Како што пишуваат бугарските медиуми, се претпоставува дека тој во болница бил примен пред неколку дена.
Патријархот Неофит е роден како Симеон Николов Димитров на 15 октомври 1945 година, а од 1989 година бил ректор на Духовната академија во Софија. Од 1991 година е декан на Богословскиот факултет при Софискиот универзитет, а од 1994 година митрополит доростолски и червенски, за после поделбата на епархијата на русенска и дорастолска, да стане митрополит русенски.
Неофит е избран за патријарх на Бугарската православна црква во 2013 година.