„Ме радува што за оваа цел и преку Меморандумот којшто ќе го потпишеме денеска, кон тимот наши експерти се приклучува и американски професионалец за национална безбедност со над 35 години работно искуство во стратешко планирање, извршни комуникации и мултинационални операции, како и истакната воена служба на глобално ниво“, истакнал премиерот Ковачевски на денешното потпишување на Меморадумот за разбирање меѓу Владите на С Македонија и САД. Меморандумот од страна на САД го потпишала американската амбасадорка во земјава, Анџела Агелер
Соединетите Американски Држави со експертска поддршка ќе ѝ помагаат на Владата во изработка на Национална стратегија за безбедност.
Ова е основата на Меморандумот за разбирање меѓу владите на Северна Македонија и на САД што денеска го потпишале премиерот Димитар Ковачевски и американската амбасадорка во земјава Анџела Агелер, соопштија попладнево од владината прес-служба.
Според премиерот, оваа соработка во едно од најсуштинските прашања за државата е уште една потврда за стратешкото партнерство и степенот на соработка меѓу двете земји.
„Како што знаете, на 19 септември, Владата ја усвои информацијата за потребата од изработка на Национална стратегија за безбедност, која ќе претставува еден суштински и стратешки документ, и обединувачка визија за нашата држава во дефинирањето на виталните и стратешките интереси за безбедно и стабилно општество“,
истакнал премиерот Ковачевски во своето обраќање на денешниот настан по потпишувањето на Меморандумот, се наведува во соопштението.
Стратегијата, како што информираат од Владата, е предвидено да ги интегрира сите министерства и институции кои имаат пристап до заштитата и промовирањето на безбедносните интереси на земјата и ќе го определи местото на Република Северна Македонија во регионалниот, европскиот и глобалниот безбедносен контекст.
„Ме радува што за оваа цел и преку Меморандумот којшто ќе го потпишеме денеска, кон тимот наши експерти се приклучува и американски професионалец за национална безбедност со над 35 години работно искуство во стратешко планирање, извршни комуникации и мултинационални операции, како и истакната воена служба на глобално ниво“,
потенцирал Ковачевски.
Амбасадорката на САД во земјава, Агелер, истакнала дека станува збор за многу важен Меморадум, кој е дел од стратешкото партнерство, кое носи огромни придобивки за двете земји.
„САД се горди, ние сме горди на нашето пријателство и на поддршката и соработката со оваа земја и горди сме што ова е стратешко партнерство коешто носи огромни придонеси за двете земји. Тоа не е еднострано партнерство, и тоа го имаме видено не само во членството на оваа земја во НАТО и придонесите коишто сте ги давале досега кон Украина, туку и во многу други аспекти од нашето партнерство и пријателство“,
нагласила американската амабсадорка во своето обраќање при потпишувањето на Меморандумот.