Лоренс Фаусет (58) првпат бил примен во болница на 14 септември, откако доживеал срцев удар, а шест дена подоцна бил подложен на експериментална трансплантација. Поради неговата постоечка срцева болест, тој не бил кандидат за традиционална трансплантација на човечко срце
Лоренс Фаусет, вториот човек на кој му беше пресадено генетски модифицирано свинско срце, почина шест недели по експерименталната процедура. Медицинскиот центар на Универзитетот во Мериленд, каде што се изврши експерименталната процедура, соопшти дека срцето почнало да покажува знаци на отфрлање во последните денови.
„Неговата последна желба беше максимално да го искористи она што го научивме од ова искуство за другите да добијат шанса за ново срце кога овој човечки орган не е достапен. Потоа, на тимот од лекари и медицински сестри кои се собраа околу него, им кажа дека ги сака. Неизмерно ќе ни недостига“,
изјави д-р Бертли Грифит од Медицинскиот факултет на Универзитетот во Мериленд кој ја изврши експерименталната операција.
Лоренс Фаусет (58) првпат бил примен во болница на 14 септември, откако доживеал срцев удар, а шест дена подоцна бил подложен на експериментална трансплантација. Поради неговата постоечка срцева болест, тој не бил кандидат за традиционална трансплантација на човечко срце.
„Единствената вистинска надеж што ми остана е да заминам со свинско срце, ксенотрансплантација“,
рече тој во болницата во интерно интервју неколку дена пред операцијата.
Неговата сопруга Ен тогаш посочи дека немаат други очекувања „освен што се надеваме дека ќе поминеме повеќе време заедно“.
Во неделите по трансплантацијата, лекарите известија дека Фаусет постигнува значителен напредок, вклучително и учество во физикална терапија и поминување време со своето семејство. Еден месец по операцијата, лекарите соопштија дека неговото срце работи совршено и дека ги повлекле сите лекови за срце.
„Во моментов немаме докази за инфекции или докази за отфрлање“,
рече тогаш Грифит.
Пациентот бил третиран со експериментален третман со антитела за дополнително да се спречи отфрлање на органите. Сепак, ова е „најзначајниот предизвик во традиционалните трансплантации кои вклучуваат и човечки органи“, велат од болницата.
По смртта на нејзиниот сопруг, Ен им се заблагодарила на сите кои беа вклучени во грижата за нејзиниот сопруг.
„Лари го започна ова патување со отворен ум и целосна доверба во д-р Грифит и неговиот тим. Знаеше дека неговото време со нас е кратко и дека ова е неговата последна шанса да направи нешто за другите“,
рекла таа.
BREAKING: Lawrence Faucette, the second person to receive a genetically engineered pig heart transplant, passed away after six weeks. https://t.co/tP2CJwJrF1
— WIRED (@WIRED) October 31, 2023
Според официјалните податоци, има повеќе од 113 000 луѓе на списокот за трансплантација на органи во САД, вклучувајќи повеќе од 3 300 луѓе на кои им треба срце. Групата Донејт лајф Америка (Donate Life America) вели дека 17 луѓе умираат секој ден чекајќи донатор.
Во јануари 2022 година, Универзитетот во Мериленд, исто така, ја изврши првата ваква експериментална операција на 57-годишниот Дејвид Бенет, кој почина два месеца по операцијата. Иако немаше знаци на отфрлање во првите недели по трансплантацијата, аутопсијата покажа дека Бенет на крајот починал од срцев удар поради голем број фактори, вклучително и неговата состојба пред операцијата. Студијата на случај опишана и објавена во „Лансет“, исто така, забележа дека има докази за претходно неидентификуван свински вирус.