Лајен: Русија и Хамас се слични и сакаат да ги избришат Украина и Израел од картата, мора да ги заштитиме демократиите

Говорејќи за конфликтот на Блискиот Исток, но и за војната во Украина, која започна пред една и пол година, Фон дер Лајен оцени дека Русија и милитантната група Хамас се слични и имаат иста суштина. Тие, според шефицата на ЕК, намерно бараат невини цивили меѓу кои и деца и бебиња за, како што вели, да ги убијат и да ги земаат како заложници

Нашите демократии се под постојан системски напад од оние што ја мразат слободата бидејќи таа го загрозува нивното владеење, порача претседателката на Европската комисија (ЕК), Урсула фон дер Лајен, во своето синоќешно обраќање во Институтот „Хадсон“ во Вашингтон. 

Говорејќи за конфликтот на Блискиот Исток, но и за војната во Украина, која започна пред една и пол година, Лајен оцени дека Русија и милитантната група Хамас се слични и имаат иста суштина. Тие, според шефицата на ЕК, намерно бараат невини цивили меѓу кои и деца и бебиња за, како што вели, да ги убијат и да ги земаат како заложници.

„Ова е варварски начин на борба и ако ја оставиме без контрола, има потенцијал да се шири од Европа, преку Блискиот Исток и до Индопацификот. Решителноста на Западот секојдневно се тестира од оние кои бараат каква било слабост. Секој успех што ќе го постигнат, ќе инспирира повеќе насилство насочено кон рушење на постојниот поредок, за чие создавање и одржување беа жртвувани толку многу животи на нашите континенти“,

порача Фон дер Лајен.

• Бајден: Хамас и Путин се различни закани, но имаат иста цел – уништување на демократијата

Кризите во Украина и на Блискиот Исток, вели претседателката на Европската комисија, ги повикуваат Европа и САД да заземат став и да застанат заедно.

„Владимир Путин сака да ја избрише Украина од картата. Хамас, поддржан од Иран, сака да го избрише Израел од картата. Мора да ги заштитиме демократиите. Ова време на војна истовремено мора да биде и време на непопустлива дипломатија. Тоа е заеднички американски и европски интерес. Стремежот за свет во кој преовладува слободата е нашата заедничка судбина“,

додава шефицата на ЕК во своето обраќање во Институтот „Хадсон“ во Вашингтон. 

From Russia’s war on Ukraine to Hamas’ terrorist attacks on Israel.

These crises, however different, call on Europe and America to take a stand – and stand together.

We must support these democracies ↓ https://t.co/frAVMfc1pz

— Ursula von der Leyen (@vonderleyen) October 19, 2023

Ескалацијата на Блискиот Исток, според Фон дер Лајен, сепак, не е неизбежна, но вели оти нестабилноста може да се ограничи преку дијалог меѓу Израел и неговите соседи, кој, како што рече, може и мора да продолжи.

Секое решение за конфликтот во Украина, пак, според неа, мора да биде трајно и да доведе до траен и праведен мир за што, како што рече, на Киев му се потребни долгорочни безбедносни гаранции.