На средбите, кои се случуваат на маргините на Генералното собрание на ОН во Њујорк, а кои доаѓаат откако откако Азербејџан почна воени операции против ерменските сили, Османи изразил загриженост за воените дејствија, но и за опасноста и влијанието кои тие ги имаат врз погоденото цивилно население
Организација за безбедност и соработка во Европа (ОБСЕ) е подготвена да им помогне на Ерменија и Азербејџан на патот кон мирот, порачал шефот на македонската дипломатија и претседавач со ОБСЕ, Бујар Османи, на одвоените средби со министрите за надворешни работи на Ерменија и Азербејџан.
На средбите, кои се случуваат на маргините на Генералното собрание на ОН во Њујорк, а доаѓаат откако откако Азербејџан почна воени операции против ерменските сили, Османи изразил загриженост за воените дејствија, но и за опасноста и влијанието кои тие ги имаат врз погоденото цивилно население.
„ОБСЕ поседува потребно искуство, експертиза и алатки за олеснување на дијалогот и градењето доверба и спроведување на релевантните договори“,
рекол Османи на одвоените средби со министрите за надворешни работи на Ерменија и Азербејџан, Арарат Мирзојан и Џејхун Бајрамов.
Повикувајќи на итна деескалација, тој повторно изразил загриженост за сериозните последици врз луѓето и истакнал дека употребата на сила за решавање на споровите е целосно неприфатлива. Нагласил дека единствениот пат кон мирот е одржливиот и конструктивен дијалог и ја изразил својата подготвеност за личен и активен ангажман во решавањето на конфликтот.
Азербејџан вчера почна воени операции против ерменските сили.
Азербејџанското Министерство за одбрана соопшти дека операцијата со помош на високопрецизно оружје почнала неколку часа по смртта на четворица војници и двајца цивили во експлозија на мина во Нагорно-Карабах, а Ерменија ги повика Советот за безбедност на ОН и Русија да преземат акција за прекин на воената операција.