Во ГОБ „8 Септември“ поставени се апарати за интервентната кардиологија, радиологија и оториноларингологија со што ќе се овозможи растеретување на Клинички центар, посебно во делот на сложените интервенции
Три нови сали со нова опрема и апарати за интервентната кардиологија, радиологија и оториноларингологија се пуштени денеска во ГОБ „8 Септември“ со што се очекува намалување на бројот на чекања за коронарографии, каротидографии, ангиографии и стентирања.
Ова ќе овозможи итните случаи со акутни инфаркти на миокард веќе да не чекаат, туку нивното згрижување и прифаќање ќе биде итно, а тоа нема да ја наруши редовната програма на пациентите кои се закажани.
Во ГОБ „8 Септември“ инсталирани се и апарат за мамографија што може дневно да опслужи 60 пациенти, апарат за ултразвук, компјутерски томограф, два најмодерни дигитални апарати за конвенционални РТГ графии и апарат за навигација.
Директорот на ГОБ „8 Септември“, Христијан Костов, на денешното пуштање на салите на кои беа и премиерот Димитар Ковачевски и министерот за здравство Фатмир Меџити, објасни за што конкретно ќе се користат салите и опремата и додаде дека нова опрема има и во Одделот за оториноларингологија.
„Имаме набавка на апаратот за мамографија што дневно може да опслужи до 60 пациенти, високософистициран апарат за ултразвук со висока резолуција, соодветен за најсофистицираните дијагностички процедури, компјутерски томограф од најнова генерација со 128-слајсен детектор, висока резолуција и брзина кој дневно може да опслужи до 40 пациенти, два најмодерни дигитални апарати за конвенционални РТГ-графии, апарат за навигација наменет за хирургијата на носот, синусите, ушите и базата на черепот со цел побезбедна хирургија особено во областа на оториноларингологија, како и СИ-АР за потребите на ортопедските интервенции“,
рече Костов.
Премиерот Димитар Ковачевски рече дека фокусот на Владата е да се создаде модерно здравство и затоа, додаде тој, ги следиме барањата на болниците, клиниките и здравствените установи во државата и го поддржуваме нивниот развој иако сме свесни за постојаните новини во медицината.
„Пуштаме во употреба најсовремена опрема во три сали. Според она што докторите го кажаа, се работи навистина за најсовремена опрема. Еден дел од апаратурата е прв пат инсталирана во државата и не постои во ниедна друга јавна здравствена установа, а помага да се лекуваат пациенти и на кардиолошките клиники овде, меѓутоа и за потребите на другите оддели во ‘8 Септември’. И покрај сите предизвици предизвикани од енергетската и економската криза, обновувањето на здравствените капацитети не престана и постојано се одвива во сите јавни здравствени установи. Денес со пуштањето на овие три нови сали за интервентна кардиологија и интервентна радиологија кои се опремени со најсофистицирани и најмодерна опрема од светски реномирани производители се создаваат услови за најсовремени интервенции за пациентите ширум државата“,
рече Ковачевски.
Според Ковачевски граѓаните заслужуваат здравство кое што е врвно, кое што се унапредува од ден на ден и кое што ги зголемува своите капацитети за згрижување на сите граѓани на коишто им е потребна здравствена нега. Затоа, додаде тој, изминатите години, после долги децении, за првпат се реновираа и се осовременија многу здравствени капацитети, се набави скапа опрема за лекување и не само во здравствените установи во Скопје туку и во здравствените установи ширум државата, додаде премиерот.
Министерот за здравство Фатмир Меџити рече дека Министерството, преку својата соработка со Светската банка и болницата ГОБ „8 Септември“ ги обезбедило останатите средства за комплетно инсталирање на оваа современа опрема.
„Заедно со премиерот денеска овде во ГОБ ‘8 Септември’ ги видовме трите сали за кардиологија и интервентна радиологија опремени со нови модерни ангиографии со што се создадени услови за интервентни кардиолошки и радиолошки процедури кои во исто време може да практикуваат на повеќе пациенти. Со ова уште повеќе се подига нивото на оваа здравствена установа. Овие сали се за интервенции од областа на кардиологија и се сериозна помош за растеретување на Клинички центар, посебно во делот на сложените интервенции“,
истакна министерот Меџити.
Според него, трите нови сали кои почнаа со работа од денеска се од исклучително значење за намалување на листите на чекање за интервенции од областа на кардиологијата: коронарографии, каротидографии и периферни ангиографии, коронарни стентирања, стентирања на каротиди и стентирања на крвни садови на екстремитетите.
Меџити, објаснувајќи ја функцијата на новите сали во ГОБ „8 Септември“, се осврна и на пофалбите и критиките за работата на здравствените установи.
„Како министер, секогаш сум отворен да ги слушам добронамерните сугестии и критики, бидејќи излекувам поука од нив. Анализите кои ги правиме за унапредување на здравствениот систем не се за да се утврдат маани и пропусти, туку за да создадеме реформски системски промени за доброто на пациентите кои се нашиот фокус“,
додаде тој.
Дел од средствата со кои денеска се пуштија салите во ГОБ „8 Септември“ во употреба се од народот на Јапонија, за што јапонскиот амбасадор во земјава директорот Костов доби Благодарница.