Проблемот бил детектиран на хрватската граница и е соодветно пријавен до Европскиот систем за рано предупредување, по што производот е безбедно уништен. Во меѓувреме, проверки за евентуално присуство на овој производ се вршат и на македонскиот пазар
Високо ниво на канцероген акриламид е откриен во чипс со вкус на пиперка, произведен во Србија, соопштија од Европската комисија (ЕК). Проблемот бил детектиран на хрватската граница и е соодветно пријавен до Европскиот систем за рано предупредување, по што производот е безбедно уништен.
По оваа информација, од српското Мистерство за земјоделство соопштија дека во тек е вонредна контрола во погоните за производство на спорниот производ. Оттаму најавија дека по добиените резултати од анализите ќе бидат објавени подетални информации и мерки што ќе ги преземе земјоделската инспекција.
АХВ проверува дали канцерогениот чипс е на македонскиот пазар
Проверки за евентуално присуство на канцерогениот чипс се вршат и на македонскиот пазар, соопшти директорот на Агенцијата за храна и ветеринарство (АХВ), Николче Бабовски.
Ако се потврди дека го има и на нашиот пазар, производот ќе биде повлечен.
„Во Системот за брзо предупредување на ниво на ЕУ сѐ уште не е нотирано дека овој производ е забранет и дека треба да се повлече од пазарите, а дали е кај нас влезен или не, веќе проверуваме“,
истакна Бабовски.
Акриламидот е супстанца која главно се формира при преработка на храна на температури над 120 степени, како и при ниска влажност, што значи печење, пржење и други форми на подготовка. Најчесто се наоѓа во леб, помфрит, чипс, житарки за појадок, бисквити, крекери и кафе.