За тоа што децата од Битола се сретнале и со бугарскиот претседател Румен Радев, Софија вели дека претставува покажување на почит од шефот на државата кон талентот на младите уметници
Уште една провокација за добрососедските односи меѓу Бугарија и Северна Македонија, е оценката со која излезе бугарското Министерството за надворешни работи (МНР) во врска со реакциите во земјава за случајот во кој детското ликовно студио „Кирил и Методиј“, организатор на колонијата „Мал битолски Монмартр“, носи деца во Бугарија, меѓу другото, на средби со бугарски политичари.
Додека овој чин во земјава беше протолкуван како злоупотреба на децата за политички цели, официјална Софија порачува дека дава поддршка на вакви иницијативи кои се „насочени кон зближување на младите од Бугарија и Северна Македонија преку културна и образовна размена“.
Благодарение на бугарската фондација „Бугарска меморија“ и со поддршка на МНР, се потенцира во реакцијата, ликовното студио „Св. Кирил и Методиј“ од Битола веќе една година реализира низа настани за талентирани деца во различни земји, од кои еден се одржа во Бугарија.
Тоа што децата се сретнале и со претседателот Румен Радев, Софија вели дека претставува покажување на почит од шефот на државата кон талентот на младите уметници.
„Обидите да се претстават ваквите позитивни иницијативи во негативен контекст во Северна Македонија предизвикуваат загриженост и збунетост. Нејасно е како се претставува како проблем демонстрацијата на почит од страна на официјални претставници на бугарската држава кон талентот на младите уметници, како и читањето на светки реномираното ремек-дело на литература за деца ’Малиот принц‘ од шефот на државата“,
пишува во реакцијата.
Бугарското МНР нагласува и дека за активностите постои согласност од родителите на децата, а поплаките во земјава се само обид за формирање негативно јавно мислење и претставуваат притисок врз оние граѓаните и организации во Северна Македонија кои поддржуваат пријателство меѓу двете држави.
„Посебно вознемирува што ова се случува во овој крајно одговорен момент кога власта во Скопје се изјасни дека се стреми да создаде позитивна клима за усвојување на уставните измени. Градењето добрососедски односи со Бугарија подразбира радикално поинаков европски пристап. Ги повикуваме нашите пријатели во Скопје да ги насочат своите напори за обезбедување европска иднина на Северна Македонија. Секоја провокација која има за цел да оправда одредени политички одлуки во претстојниот клучен период ја става ваквата иднина во ризик“,
наведува бугарското МНР потенцирајќи и дека очекува институциите во земјава јасно и јавно да ги осудат „провокациите“.
За случајот со „Мал битолски Монмартр“ најмногу реакции во соседството предизвика изјавата на министерот за внатрешни работи кој рече дека по допрен глас МВР го известило обвинителството.
Тој рече дека за случајот дознал од медиумите кои објавија дека во рамки на проект за добрососедски односи, деца од Битола биле носени во Бугарија каде што биле на средба и со бугарски политичари.
„Ниту еден родител ниту ’Меѓаши‘ или друга организација нема доставено кривична пријава. По доставувањето на известувањето веќе имаме предмет. Апелирам и за овој и за друг случај да се достават кривични пријави, да се земат изјави на записник во однос на овие случаи за да можат и институциите да постапуваат. Не треба да ги отвораме предметите само по допрен глас. Доколку има некаква злоупотреба, тоа да се пријавува, за да можеме да постапуваме“,
изјави вчера Спасовски.
Меѓу оние кои реагираа во земјава беше Првата детска амбасада во светот „Меѓаши“ посочувајќи дека „наместо децата да се третираат сериозно, тука се користат како инструмент за политички цели, со изговор за развивање добрососедски односи“.
„Поради сето ова горенаведено, го повикуваме Основното јавно обвинителство (ОЈО) да преземе соодветни мерки особено поради инволвирање на децата од Македонија во политички кампањи во друга земја и неколкукратно прекршување на правата на децата согласно Конвенцијата за правата на детето и Член 12 став 4 од Законот за заштита на деца: ’Се забранува злоупотреба на децата поради политичко или верско организирање и дејствување‘“,
рекоа од „Меѓаши“.