Орхан Бајрами починал од повредите, а Сеад Слезовиќ е пренесен во болницата во градот Полигирос.
Дел од грчките медиуми информираат дека жртви во нападот што се случи рано изутрината околу 3 часот во Ханиоти се 39-годишниот Бајрами и неговиот 45-годишен пријател Слезовиќ. Сѐ уште има две верзии за случувањата – едната е дека маскирани лица упаднале во нивниот апартман, а другата е дека биле сочекани пред влезот, при што врз нив биле испукани дваесетина куршуми.
Кај Бајрами била констатирана смрт, а Слезовиќ бил префрлен во болницата во Полигирос.
Терминот кој грчките медиуми го користат за да го опишат настанот е „егзекуција“. Инаку, Орхан Бајрами го портретираат како бизнисмен во сферата на казината и производството на пијалаци.
Во минатото името на Бајрами се поврзуваше со криминални кланови и со пресметки во скопското подземје.