Седницата ја следеше и министерот за правда. По одлуката, Лога рече дека сега се отвора Пандорината кутија бидејќи, според него, во многу наврати не бил почитуван уставниот рок за објавување подзаконски акти во „Службен весник“
Уставниот суд донесе одлука со која привремено го стави надвор од употреба упатството на министерот за правда Кренар Лога со кое се издава извод на родени во кој има графа за етничка припадност.
Основната причина за поведување на постапката е пречекорување на рокот за потпишување – од потпишување, до објава во „Службен весник“. Министерот за правда го потпишал упатството на 29 мај, а во „Службен весник“ е објавено на 15 јуни.
Седницата ја следеше и Лога кој по одлуката рече дека сега се отвора Пандорината кутија бидејќи, според него, во многу наврати не бил почитуван уставниот рок за објавување на подзаконски акти во „Службен весник“.
Тој најави дека утре ќе достави десетици иницијативи до Уставниот суд за прекршување на уставниот рок со кој е предвидено секој закон и правен акт донесен од институција да се објави во „Службен весник“.
Уставните судии изразија сомнеж во уставноста на ова упатство и покренаа иницијатива за проверка на законитоста. Додека одлучат за упатството на министерот, ќе важи времената мерка, односно во изводите нема да се става графата за етничка припадност.
Досега во изводите имаше графа за државјанството, но не и графа за национална припадност.
Претходно и поранешната министерка за правда Рената Дескоска се изјасни дека графата за националност во изводот не е законска, односно дека за етничката припадност нема место во изводите.
Според неа, етничката припадност се пишува во матичната книга, но не сè што е напишано во матичната книга треба да стои и во изводите.
Етничката припадност спаѓа во групата сензитивни податоци, кои подлежат на посебна заштита, согласно правилата за заштита на личните податоци. Други такви податоци, реагираше таа, се: религиозна припадност, политичка определба, здравствена состојба, сексуална ориентација итн.