Според министерката Јованка Тренчевска во преговорите за зголемување на платите во јавниот сектор досега не се разговарало за 14 отсто, како што рекоа вчера синдикалните претставници по седницата на Економско-социјалниот совет
Доколку функционерите, утре, се откажат од нивните 78 отсто зголемени плати секој вработен во јавниот сектор би добил по 1 500 денари во нето на сметка ако тие пари се трансферираат во плати на вработените во јавниот сектор, вели претседателот на ССМ
Утре продолжуваат разговорите меѓу Владата и синдикатите за изнаоѓање на решение за зголемување на платите во јавниот сектор. Вчера, од Сојузот на синдикати на Македонија (ССМ), по одржувањето на Еконосмко-социјалниот совет, рекоа дека нивниот предлог е инфлацијата која минатата година беше 14,5 проценти да биде основниот параметар со кој ќе се зголемат платите во јавниот сектор и сите да добијат исплата на регрес за годишен одмор.
Но, претставници на владата, кои се дел од Економско-социјалниот совет, се зачудени од каде излегол предлогот на синдикатите за зголемување на платата во јавниот сектро да биде 14 отсто. Откако вчера вицепремиерот Фатмир Битиќи кажа дека не знае од каде излегол тој предлог од ССМ, денеска од таа бројка е зачудена и министерката за труд и социјална политика, Јованка Тренчевска.
Според Тренчевска во преговорите за зголемување на платите во јавниот сектор досега не се разговарало за 14 отсто, како што рекоа вчера синдикалните претставници по седницата на Економско-социјалниот совет.
„Јас не знам од каде 14 отсто кога досега не се разговараше за 14 отсто. Се разговара за систем за плати којшто ќе одговара на сите, да не заборавиме дека платите на дел од државните службеници беа зголемени во март за 2 175 денари, тоа зависно, кај некои е 7 или 8 отсто, а кај други е дури и 16 проценти. Сега во моментов се разговара во рамки на Економско – социјалниот совет да се најде системско решение. Се работи да најдеме систем кој ќе биде во ред и за синдикатите и за работодавачите, односно и за Владата и за сите“,
одговори денеска Тренчевска на новинарско прашање, по потпишувањето на Програмата за достоинствена работа.
Претседателот на ССМ, Слободан Трендафилов, кој присуствуваше на настанот, повтори дека „инфлацијата која минатата година според официјалните податоци е 14,2 проценти, треба да биде основниот параметар по кој ќе се пресметуваат платите на вработените во јавниот сектор.
„Целта на Економско-социјалниот совет е токму тоа, да се слушаат социјалните партнери, да се слушаат мислењата кои се различни и да градите ставови врз основа на мислењата на сите социјални партнери. Тоа што вчера го разговаравме беше токму во таа насока. Нивните плати да се намалат за да дадат на македонските граѓани и работници позитивен придонес и пример дека тоа што го направија со уставниот суд е нечовечки и нелогично, да ги зголемуваат нивните плати 78 отсто во услови кога платите на вработените се зголемуваат за нула проценти. Вториот момент за кој разговаравме е за инфлацијата која минатата година е 14,2 отсто. Ако имаме предвид дека сѐ се зголемило за 14,2 проценти, вашите плати автоматски се намалиле за 14,2 проценти и на тој начин да го елиминираме моментот на губење на куповната моќ и односно работниците да можат да го преживеат месецот“,
рече Трендафилов.
Според Трендафилов на советот имало различни размислувања и го потсети вицепремиерот Битиќи дека разговарале и за 12,55 отсто колку што е порасната минималната плата, а од одредени претставници на синдикати, како што рече Трендафилов, било споменато и 10,9 колку што е порасната просечната плата.
„Доколку функционерите утре се откажат од нивните 78 отсто зголемени плати секој вработен во јавниот сектор би добил по 1 500 денари во нето на сметка ако тие пари се трансферираат во плати на вработените во јавниот сектор“,
додаде Трендафилов повторувајќи дека претставниците на Владата ги имаат слушнато тие 14,2 отсто, но рече дека ги разбира оти треба да даваат политички изјави.
Тренчевска и Трендафилов одговараа и на новинарско прашање околу времетраењето на работната недела за работниците што ќе бидат ангажирани за проектот со „Бехтел и Енка“ за изградба на автопатите, при што министерката посочи дека никаде не пишува дека градежните работници ќе работат 72 часа во континуитет.
„Работното време е 40 часа, со дополнително осум часа најмногу во неделата. За стратешки приоритети, се дозволува, кога дозволуваат временските услови, да се работи над овие 48 часа. Но, во законот не пишува никаде дека се тоа 72 часа. Тоа зависи од временските услови, од процесот на работа. Затоа треба да бидеме објективни кога зборуваме за работното време на коридорите 8 и 10-д, дека не е 72 часа работно време. Можеби е над дозволените 48, но не е 72 часа“,
рече Тренчевска, нагласувајќи дека ќе се почитуваат законските одредби.
Според неа безбедноста и здравјето на работниците ќе бидат гарантирани за сите.
Трендафилов, пак, изрази жалење што, како што рече, математиката на министерката е друга.
„Тоа што го кажува таа избегнува само да каже 72 часа. Во спротивно со другото го потврди тоа што го велиме ние, дека работниците на тие коридори ќе работат 12 часа, дневно, 12 часа дневно ќе имаат дневен одмор и дека на крајот на неделата ќе имаат 24 часа неделен одмор. И тоа што министерката заборава да го каже во тој поглед, дека го укинаа правото неделен работен ден. Така што може лесно да се случи да не излезе државниот инспектор за труд на контрола на терен. На тој начин седум дена да работат по 12“,
рече тој, потсетувајќи дека во изминатиот период, повеле иницијатива на Уставен суд, токму по ова прашање и паднала одредбата во Основниот закон.
До крајот на неделата или на почеток на наредната недела, дополни, со поддршката од професорите која ја добиваме и од меѓународните организации на трудот, ќе ја поднесеме и новата иницијатива за оспорување на овие одредби спротивни на Устав, на конвенциите на меѓународните организации на трудот, на директивите на ЕУ.