Возраста на заболените сега е од 0 до 91, а најголем број на заразени се на возраст од 50 до 59 години
Најмногу нови случаи на новозаразени со ковид-19 во земјава на дневно ниво, од почетокот на кризата, е регистриран на 4 април, според статистиката на Институтот за јавно здравје. Првиот случај е регистриран во деветтата недела од 2020 година, а од 11 недела во оваа година континуирано се регистрираат нови потврдени случаи.
Од пријавените случаи, 23,5 проценти биле хоспитализирани во текот на болеста, а другите биле или се на домашно лекување и во домашна изолација, асимптоматски или со полесна клиничка слика. Во однос на симптомите кои се пријавени кај заболените лица, најчесто се регистрирани температура (64,1%), кашлица (60,2%), слабост (34,4%), треска (20,1%), болка во грло (16,6%), отежнато дишење (16,2%) и главоболка (16,0%), а 206 лица биле без симптоми, според статистиката на ИЈЗ.
Кај 181 лице се присутни хронични здравствени состојби, од кои 126 имаат кардиоваскуларна болест, 36 се со хронична белодробна болест, 35 со дијабет, 11 со хронична бубрежна болест и 23 со други хронични болести. Од хоспитализираните случаи, кај 80 отсто се присутни придружни болести. Регистрирани се 82 случаи на заболување меѓу здравствени работници.
Од вкупниот број на заболени, 319 се мажи, а 344 женски лица. Возраста на заболените сега е од 0 до 91 години или во просек 46 години. Најголем број на заболени се на возраст од 50 до 59 години – 141 случај или 21,3 проценти.
Стапката на зачестеност на заразени од новиот вирус и натаму е највисока во Дебар. Таму присуството на заболени е 176,5 на 100 000 жители. Во Куманово инциденцата на 100 000 жители е 100,2, додека зачестеност над 30 на 100 000 жители е регистрирана во Скопје, Кочани, Штип, Прилеп, Крушево и Струга, како што се посочува во најновите статистики на ИЈЗ.
*поврзана вест: Филипче: Со посебни насоки ќе се враќа животот во нормала