Ние сме ваши партнери, пријатели и сојузници, продолжуваме да го негуваме нашето пријателство и понатаму, порача амбасадорот
Пораки за постоењето на македонскиот јазик испрати попладнево британскиот амбасадор во земјава, Метју Лосон, на приемот што го организираше амбасадата по повод одбележувањето на роденденот на британскиот крал Чарлс Трети.
„Не треба да дебатираме дали постои македонскиот јазик. Го зборуваме, го предаваат на нашите универзитети, се пишуваат деловни договори на македонски јазик… Ми се чини дека секој што негира дека постои македонскиот јазик не му кажал на ’Визер‘ бидејќи секој месец се пријавувам на македонски јазик за мојот лет кога се враќам дома. Ова е мојот начин, нашиот британски начин да кажеме ’ние сме ваши партнери, пријатели и сојузници, продолжуваме да го негуваме нашето пријателство и понатаму‘“,
рече Лосон, пренесе МИА.
Годинава Велика Британија и Северна Македонија одбележуваат и 30 години од воспоставувањето дипломатски односи, за што Лосон порача дека земјава секогаш ќе ја има нивната поддршка како рамноправен партнер.
„Секогаш ќе ја поддржуваме Северна Македонија како рамноправен партнер во трговијата, инвестициите, во НАТО, ОБСЕ, Обединетите нации. Нашето партнерство се протега и во вашата култура, јазик и историја. Ние сме горди на нашата историја и нашиот јазик во Обединетото Кралство, особено оваа година со крунисувањето на нашиот нов крал и разбираме и почитуваме дека и вие сте горди за вашиот јазик и вашата историја“,
дополни Лосон.
На настанот што се одржа во Музејот на современата уметност во Скопје присуствуваше и специјалниот британски претставник за Западен Балкан, Стјуарт Пич, кој истакна дека се гордеат што и Северна Македонија стои со Украина.
„Како специјален претставник, дел од мојата улога е да промовирам отпорни и отворени општества. Додека беснее војна во Украина, на едвај 700 километри оттука, ова никогаш не било поважно. Стоиме заедно со Украина соочени со руската агресија затоа што веруваме во демократијата и меѓународниот систем заснован на правила. Горди сме што и Северна Македонија стои со Украина, не само со тоа што е значаен билатерален донатор, туку и со тоа што придонесува на пошироката европска безбедност преку НАТО“,
рече Пич.
Тој рече дека Северна Македонија игра водечка улога на меѓународно ниво не само преку НАТО, при што потсети дека земјава е претседавач со ОБСЕ во време кога Русија се обидува да го поткопа пристапот на организацијата базиран на консензус.
Тој зборуваше и за реформите што треба да се спроведат, за што рече дека политичката посветеност е клучна и оти Обединетото Кралство работи заедно со Северна Македонија во поддршка на институциите, граѓанското општество, слободните медиуми, истовремено промовирајќи го почитувањето на човековите права вклучително и родовата еднаквост.
Пич најави и дека наскоро ќе биде отворена бизнис комора на Обединетото Кралство/Северна Македонија, што ќе им овозможи на другите да ги споделат плодовите од ова партнерство.
На приемот на британската амбасада по повод роденденот на кралот Чарлс Трети присуствуваа и претставници на државниот врв, како премиерот Димитар Ковачевски и други членови на Владата, и претседателот на Собранието, Талат Џафери.
Во рамките на одбележувањето на роденденот денеска се одигра и фудбалски натпревар помеѓу женската селекција на Северна Македонија и армиската екипа на Велика Британија.