Вработените во Управата за јавни приходи предупредуваат дека доколку не се потпише колективниот договор и не го добијат бараното покачување на платите следен чекор им е генерален штрајк
Потпишување на колективниот договор за покачување на платите за 30 отсто побараа денеска вработените во Управата за јавни приходи кои излегоа на протест пред Министерството за финансии, а кои се незадоволни од недавањето согласност од страна на министерот за финансии Фатмир Бесими за потпишување на тој договор.
Вработените во Управата за јавни приходи предупредуваат дека доколку не се потпише Колективниот договор и не го добијат бараното покачување на платите следен чекор им е генерален штрајк, кој како што нагласуваат ќе биде на штета на целата држава затоа што ќе значи целосно неизвршување на работните задачи од страна на сите вработени во УЈП.
Претседателот на Синдикалната организација „Солидарност“ при УЈП, Васе Неданоски, изјави дека изготвен е нов Колективен договор во кој се утврдени неопходните права потребни за функционирање на управата, меѓу кои е и правото на зголемување на платите кое е одобрено со член 66 од Законот за буџети.
„Колективниот договор не е потпишан и тоа е една од причините што сме тука бидејќи правото на зголемување на плати е опфатено со посочениот договор меѓутоа се уште не е потпишан и покрај фактот што направивме отстапки на определени права, дојдовме до определен договор, но конкретен исчекор нема“,
вели Неданоски.
Неданоски вели дека покачувањето на платите кое го бараат е 30 отсто согласно законски основ, одредби од член 66 од Закон за буџети.
„За 14 години платите на вработените во УЈП се коригирани само за пет отсто, а во последните четири години не се покачени ниту за еден денар“,
рече Неданоски.